‘மஞ்ஞுமல் பாய்ஸ்’ மற்றும் ‘பாலன்’ ஆகிய படங்களை இயக்கிய சிதம்பரம், நடிகர் ரிஷப் ஷெட்டியுடன் இணைந்து பணியாற்ற இருப்பதாக தகவல்கள் வெளியாகியுள்ளன. இருவரும் இணையும் திட்டம் குறித்து தற்போது திரையுலகில் எதிர்பார்ப்பு உருவாகியுள்ளது.
ரிஷப் ஷெட்டி இயக்கி நடித்த ‘காந்தாரா சாப்டர் 1’ கடந்த ஆண்டு வெளியாகி பெரிய வெற்றியை பெற்றது. பான் இந்தியா அளவில் வெளியான அந்தப் படம் ரூ.800 கோடிக்கும் அதிகமாக வசூலித்ததாக கூறப்படுகிறது. இதன் மூலம் இந்திய அளவில் ரிஷப் ஷெட்டியின் கவனம் மேலும் அதிகரித்தது.
தற்போது ‘ஜெய் ஹனுமான்’, ‘சிவாஜி’ உள்ளிட்ட படங்களில் நடித்து வரும் ரிஷப் ஷெட்டி, சிதம்பரம் இயக்கத்தில் இரண்டு படங்களில் நடிக்க ஒப்பந்தமாகியுள்ளதாக தகவல்கள் தெரிவிக்கின்றன. இதில் ஒரு படம் விளையாட்டை மையமாக கொண்ட கதையாக உருவாகவுள்ளதாகவும் கூறப்படுகிறது. இந்த இரண்டு படங்களையும் சிபு தமீன்ஸ் தயாரிக்க இருப்பதாக தகவல் வெளியாகியுள்ளது. எனினும், இந்த கூட்டணி மற்றும் படங்கள் தொடர்பான அதிகாரப்பூர்வ அறிவிப்பு வெளியாகவில்லை.
