‘ரோஜா’ திரைப்படத்தின் மூலம் இந்திய அளவில் மிகப்பெரிய வரவேற்பைப் பெற்ற நடிகை மதுபாலா, தற்போது ‘மது’ என்ற பெயரில் திரையுலகில் அறியப்படுகிறார். ‘ரோஜா’ திரைப்படத்திற்குப் பிறகு தமிழில் ‘ஜென்டில்மேன்’, ‘பாஞ்சாலங்குறிச்சி’ உள்ளிட்ட சில திரைப்படங்களில் மட்டுமே நடித்த அவர், பின்னர் சினிமாவில் இருந்து ஓரளவு விலகியிருந்தார். தற்போது மீண்டும் நடிப்பில் கவனம் செலுத்தி வரும் மது, தமிழ் மற்றும் மலையாள மொழிகளில் உருவாகியுள்ள ‘சின்ன சின்ன ஆசை’ திரைப்படத்தில் முக்கிய கதாபாத்திரத்தில் நடித்துள்ளார். சமீபத்தில் வெளியான ‘கருப்பு’ திரைப்படத்தின் மூலம் தமிழ் ரசிகர்களிடையே கவனம் பெற்ற மலையாள நடிகர் இந்திரன்ஸ், இந்த திரைப்படத்தில் கதாநாயகனாக நடித்துள்ளார். இந்த படம் வருகிற ஜூன் 19ஆம் தேதி திரையரங்குகளில் வெளியாக உள்ளது.
இந்த திரைப்படத்தின் விளம்பர நிகழ்ச்சியில் கலந்து கொண்ட நடிகை மது, தனது திரைப்பயணத்தில் மறக்க முடியாத ஒரு சம்பவத்தை பகிர்ந்து கொண்டார். குறிப்பாக, மலையாள சினிமாவின் முன்னணி நடிகரான மோகன்லால், நேபாளத்தில் நடைபெற்ற படப்பிடிப்பின்போது தன்னை பாதுகாத்த சம்பவத்தை அவர் நினைவுகூர்ந்தார்.
1992ஆம் ஆண்டு மலையாளத்தில் வெளியான ‘யோதா’ திரைப்படத்தில் மோகன்லாலுக்கு ஜோடியாக மது நடித்திருந்தார். இந்த திரைப்படத்தை பிரபல இயக்குநரும் ஒளிப்பதிவாளருமான சந்தோஷ் சிவன் இயக்கியிருந்தார். படத்தின் பெரும்பாலான காட்சிகள் நேபாளத்தில் படமாக்கப்பட்டன. அப்போது ஒரு பாடல் காட்சியின் படப்பிடிப்பு, நேபாளத்தின் மிகவும் பரபரப்பான சந்தை பகுதியில் அமைந்திருந்த கோவில் போன்ற உயரமான இடத்தில் நடைபெற்றுக் கொண்டிருந்ததாக மது தெரிவித்தார்.
அந்த பகுதி மாலை நேரங்களில் மிகவும் கூட்டம் நிறைந்த இடமாக மாறிவிடும் என்றும், குறிப்பாக மாலை 6 மணிக்குப் பிறகு அங்கு வேலை செய்யும் பலர் மது அருந்துவதற்காக கூடுவார்கள் என்றும் அவர் கூறினார். அப்படிப்பட்ட ஒரு சூழ்நிலையில், சிலர் அனுமதியின்றி தன்னை நோக்கி வருவதை பார்த்ததும் தனக்கு மிகவும் பயமாக இருந்ததாக மது நினைவுகூர்ந்தார்.
அந்த நேரத்தில் நிலைமையின் தீவிரத்தை உணர்ந்த நடிகர் மோகன்லாலும், இயக்குநர் சந்தோஷ் சிவனின் உதவியாளரான விஜயும் உடனடியாக இருவரும் மதுவின் கைகளை பிடித்து பாதுகாப்பாக அந்த உயரமான பகுதியிலிருந்து கீழே இறக்கி, மக்கள் கூட்டத்தின் வழியாக அழைத்துச் சென்று காரில் ஏற்றினர். பின்னர் அவரை பாதுகாப்பாக அருகிலிருந்த காவல் நிலையத்திற்கு அழைத்துச் சென்றதாக மது தெரிவித்தார். அதன்பிறகு காவல்துறையினர் தலையிட்டு அங்கு இருந்த பிரச்சினையை கட்டுப்படுத்தியதுடன், நிலைமையையும் சுமூகமாக்கினர். அந்த சம்பவம் குறித்து பேசும்போது, “அந்த சூழ்நிலையில் மோகன்லாலும், படக்குழுவினரும் எனக்காக காட்டிய அக்கறையும் பாதுகாப்பும் என் வாழ்க்கையில் என்றும் மறக்க முடியாத ஒன்றாக இருக்கும்” என்று மது நெகிழ்ச்சியுடன் தெரிவித்துள்ளார்.
