கதாபாத்திரத்தின் மூலம் பார்வையாளர்களை நெருங்க அந்தந்த மொழியை கற்றுக்கொள்வது அவசியம் என நினைக்கிறேன்- நடிகை ராஷி கண்ணா!

நடிகை ராஷி கண்ணா, ஆரம்பத்தில் ஹிந்தி திரைப்படத்தின் மூலம் அறிமுகமானாலும், அதன் பின்னர் சில ஆண்டுகள் தெலுங்கு திரைப்படங்களில் தொடர்ந்து நடித்து வந்தார். இதனைத் தொடர்ந்து தமிழில் ‘இமைக்கா நொடிகள்’, ‘அடங்கமறு’, ‘திருச்சிற்றம்பலம்’, ‘அரண்மனை 4’, ‘சர்தார்’ உள்ளிட்ட பல திரைப்படங்களில் நடித்ததன் மூலம் தமிழ் ரசிகர்களிடமும் தனக்கென ஒரு இடத்தை பிடித்தார். தெலுங்கு மற்றும் தமிழ் திரைப்படங்களில் மாறிமாறி கவனம் செலுத்தி வந்த ராஷி கண்ணா, தற்போது மீண்டும் ஹிந்தி சினிமாவை நோக்கி தனது கவனத்தை திருப்பியுள்ளார். இந்நிலையில், ஹிந்தியில் 2 முதல் 3 திரைப்படங்களில் ஒப்பந்தமாகி நடித்து வருவதுடன், தெலுங்கில் பவன் கல்யாண் நடிக்கும் ‘உஸ்தாத் பகத்சிங்’ திரைப்படத்திலும் முக்கிய கதாபாத்திரத்தில் நடித்துக் கொண்டிருக்கிறார்.

சமீபத்தில் அளித்த ஒரு பேட்டியில் ராஷி கண்ணா பேசுகையில், மொழிகளை கற்பது தனக்கு மிகவும் பிடித்த விஷயம் என்றும், அதனை ஒரு பணியாகவே செய்து வருவதாகவும் தெரிவித்துள்ளார். ஹிந்தி, ஆங்கிலம், தமிழ், தெலுங்கு மொழிகளை நன்றாக பேச முடியும் என்றும், தற்போது பஞ்சாபி மொழியையும் பேச கற்றுக்கொண்டுள்ளதாகவும் அவர் கூறினார். இதற்குடன், கொஞ்சம் பெங்காலி மொழியும் தெரியும் என்றும், ஒவ்வொரு மொழியிலும் சிறந்த கதாபாத்திரங்களில் நடிக்க வேண்டும் என்பதே தனது விருப்பம் என்றும் விளக்கினார்.

மேலும் அவர் கூறுகையில், கதாபாத்திரங்கள் முக்கியமானதாக இருந்தாலும், பார்வையாளர்களுடன் நெருக்கமாக தொடர்பு கொள்ள அந்தந்த மொழியை கற்றுக்கொள்வது அவசியம் என நினைப்பதாக தெரிவித்துள்ளார். அதனால் தான், எந்த மொழி திரைப்படங்களில் நடித்தாலும், அந்த மொழியை கற்றுக்கொள்ள முயற்சி செய்வதாக அவர் கூறினார். பவன் கல்யாண் கதாநாயகனாக நடிக்கும் ‘உஸ்தாத் பகத்சிங்’ திரைப்படத்தில் நடிக்க வாய்ப்பு வந்தபோது, பவன் கல்யாண் என்பதற்காகவே கதையை கூட கேட்காமல் ஒப்புக்கொண்டதாகவும் அவர் தெரிவித்துள்ளார். சினிமாவில் பணியாற்றும் அனைவரும் சிறந்த படைப்புகளை வழங்கவே உழைக்கிறார்கள் என்றும், அதற்காக அனைவரும் முழுமையான பங்களிப்பை வழங்கி வருகிறார்கள் என்றும் கூறிய ராஷி கண்ணா, பல மொழிகளில் பணியாற்றினாலும் எந்த விதமான வித்தியாசத்தையும் தான் உணரவில்லை என்றும் தெரிவித்துள்ளார்.

மேலும் தனது விருப்பங்கள் குறித்து பேசிய அவர், நடிகர்கள் ரன்பீர் கபூர் மற்றும் விக்கி கவுஷல் ஆகியோர் வித்தியாசமான கதைகளை தேர்வு செய்து நடிப்பதை மிகவும் விரும்புவதாகவும், அவர்களுடன் இணைந்து நடிக்க வேண்டும் என்ற ஆசை இருப்பதாகவும் கூறினார். அதேபோல், இயக்குநர் சஞ்சய் லீலா பன்சாலி தனது திரைப்படங்களில் பெண் கதாபாத்திரங்களுக்கு முக்கியத்துவம் வழங்குவதால், அவரது இயக்கத்தில் நடிக்க வேண்டும் என்ற விருப்பமும் இருப்பதாக தெரிவித்துள்ளார். இந்த பட்டியலில் ரிஷப் ஷெட்டி மற்றும் ராஜமவுலி ஆகியோரும் இருப்பதாக அவர் தெரிவித்தார்.