இயக்குநர் ராஜ்குமார் பெரியசாமி இயக்கத்தில் நடிகர் சிவகார்த்திகேயன் நடித்துள்ள ‘அமரன்’ திரைப்படத்தை கமல்ஹாசனின் ராஜ்கமல் புரொடக்ஷன் நிறுவனம் தயாரித்துள்ளது. இதில், சிவகார்த்திகேயனுக்கு ஜோடியாக சாய் பல்லவி நடித்துள்ளார்.
இப்படத்தில் சிவகார்த்திகேயன் ராணுவ வீரராக ‘முகுந்தன்’ என்ற கதாபாத்திரத்தில் நடித்துள்ளார். தீபாவளி பண்டிகையை முன்னிட்டு உலகம் முழுவதும் வெளியான இத்திரைப்படம் மக்களிடையே பெரும் வரவேற்பைப் பெற்றுள்ளது. இந்தப் படம் உலக அளவில் வெளியான முதல் நாளில் மட்டும் 42.3 கோடி ரூபாய் வசூலித்துள்ளது. இது சிவகார்த்திகேயன் நடித்த படங்களில் மிகப் பெரிய ஓப்பனிங் வசூலான திரைப்படமாக திகழ்கிறது.
இந்தச் சூழ்நிலையில், சூப்பர்ஸ்டார் ரஜினிகாந்த் அமரன் படத்தை பார்த்து மகிழ்ந்துள்ளார். கமல்ஹாசனை தொலைபேசியில் தொடர்பு கொண்டு ரஜினிகாந்த், இப்படத்தை தயாரித்ததற்காக மனமார்ந்த பாராட்டுகளைத் தெரிவித்தார். மேலும், அமரன் படத்தின் கதாநாயகன் சிவகார்த்திகேயன், இயக்குநர் ராஜ்குமார் பெரியசாமி, தயாரிப்பாளர் ஆர். மகேந்திரன், ஒளிப்பதிவாளர் சாய் உள்ளிட்ட படக்குழுவினரை நேரில் சந்தித்து, அவர்களுக்கு தனது பாராட்டுகள் மற்றும் வாழ்த்துகளை ரஜினிகாந்த் தெரிவித்தார்.
