தமிழ் சினிமாவின் மாயாஜால வித்தகராய் ஜொலித்த இயக்குனர் கே.பாக்யராஜ்!

தமிழ் சினிமாவில் வசீகரமான தோற்றம், வீரமான நடை, ஆக்ரோஷமான முகபாவனை கொண்டவர்களே கதாநாயகர்களாக பார்க்கப்பட்ட காலத்தில், மூக்குக் கண்ணாடி, அப்பாவித்தனமான முகபாவனை மற்றும் இயல்பான நடிப்பை தனது தனித்துவமான அடையாளமாக மாற்றி, அன்றைய கதாநாயகர்களுக்கான வழக்கமான இலக்கணத்தை உடைத்து புதிய பரிமாணத்தை உருவாக்கியவர் கே. பாக்யராஜ். ஒரு சாதாரண இளைஞனும் கதாநாயகனாக வெற்றி பெற முடியும் என்பதை தனது திரைப்பயணத்தின் மூலம் நிரூபித்து, தமிழ் சினிமாவின் போக்கையே மாற்றியவர் என்ற பெருமையை அவர் பெற்றுள்ளார்.

அப்பாவியான தோற்றம் கொண்ட ஒருவராலும் கொடூரமான வில்லன் கதாபாத்திரத்தை திறம்பட ஏற்று ரசிகர்களை ஆச்சரியப்படுத்த முடியும் என்பதை பாக்யராஜ் நிரூபித்தார். பி.வி. பாலகுரு இயக்கிய ‘கன்னிப் பருவத்திலே’ திரைப்படமும், அவரே இயக்கிய ‘விடியும் வரை காத்திரு’ திரைப்படமும் அதற்குச் சிறந்த எடுத்துக்காட்டுகளாக அமைந்தன. இந்த இரண்டு படங்களிலும் அவரது வித்தியாசமான நடிப்பு பெரும் வரவேற்பைப் பெற்றது.

பல திரைப்படங்களில் கதாநாயகனை விடவும், இயக்குநரை விடவும், வசனகர்த்தாவாக பாக்யராஜ் பெற்ற பாராட்டு தனித்துவமானது. அவரது வசனங்களுக்காகவே ரசிகர்கள் திரையரங்குகளில் கைதட்டி, விசில் அடித்து கொண்டாடிய தருணங்கள் ஏராளம். குறிப்பாக, ‘கன்னிப் பருவத்திலே’ திரைப்படத்தில் நடிகை வடிவுக்கரசியுடன் இடம்பெற்ற காட்சியில் அவர் எழுதியும் நடித்தும் பேசிய வசனங்களும், தனது குருநாதர் பாரதிராஜா இயக்கிய ‘ஒரு கைதியின் டைரி’ திரைப்படத்தில் நடிகர் விஜயனிடம் கமல்ஹாசன் கொலை செய்வதற்கு முன் பரீட்சித் மகாராஜா கதையை எடுத்துரைக்கும் வசனங்களும் இன்றளவும் தமிழ் ரசிகர்களால் மறக்க முடியாத வசனங்களாக கொண்டாடப்படுகின்றன.

தமிழ் திரையுலகில் மட்டுமல்லாமல், பாலிவுட்டிலும் தனது படைப்பாற்றலால் தனி முத்திரை பதித்தவர் பாக்யராஜ். அமிதாப் பச்சன், அனில் கபூர் உள்ளிட்ட முன்னணி நடிகர்கள் அவருடைய இயக்கத்தில் நடிக்க விருப்பம் தெரிவித்தனர். ‘ஆக்ரி ராஸ்தா’, ‘மிஸ்டர் பேச்சரா’, ‘பாப்பா தி கிரேட்’ உள்ளிட்ட ஹிந்தி திரைப்படங்களை அவர் இயக்கியுள்ளார். மேலும், அவரது பல வெற்றிக் கதைகள் ஹிந்தி மற்றும் பிற மொழிகளில் மறுஉருவாக்கம் செய்யப்பட்டு, அவற்றின் மூலம் அனில் கபூர் போன்ற நடிகர்கள் நட்சத்திர அந்தஸ்தைப் பெற்றனர். சினிமாவைத் தாண்டி எழுத்துலகிலும் தனது முத்திரையைப் பதித்த பாக்யராஜ், ‘பாக்யா’ வார இதழை இருபது ஆண்டுகளுக்கும் மேலாக நடத்தி, இலக்கிய வாசகர்களிடமும் தனக்கென ஒரு இடத்தைப் பெற்றார்.

பாக்யராஜ் கதாநாயகனாக அறிமுகமான ‘புதிய வார்ப்புகள்’ திரைப்படத்தில் இடம்பெற்ற ஒரு காட்சியில், “உங்களுக்கு இன்னும் கல்யாணம் ஆகலையா?” என்று கேட்கும் பெண்ணிடம், “நான் அனாதைங்க… எனக்கு அம்மா, அப்பா இல்லை” என்று அவர் பேசும் வசனம் ரசிகர்களை நெகிழச் செய்தது. அந்தக் காட்சி படமாக்கப்படுவதற்கு பத்து நாட்களுக்கு முன்புதான் அவரது தாயார் காலமானிருந்தார். பின்னர் அந்தக் காட்சியை திரையில் பார்க்கும் ஒவ்வொரு முறையும் தன்னுடைய கண்களில் தன்னிச்சையாக கண்ணீர் வழியும் என்று பாக்யராஜ் பல்வேறு பேட்டிகளில் உருக்கமாக பகிர்ந்துள்ளார்.

மறைந்த முன்னாள் முதல்வர் எம்.ஜி.ஆர் மீது அளவற்ற மரியாதையும் பாசமும் கொண்டிருந்தவர் பாக்யராஜ். அவரது திருமணத்திற்கு இரண்டு உயரமான குத்துவிளக்குகளை திருமணப் பரிசாக வழங்கியதோடு, திருமண வரவேற்பிலும் நேரில் கலந்து கொண்டு வாழ்த்தினார் எம்.ஜி.ஆர். இன்றும் அந்தக் குத்துவிளக்குகள் பாக்யராஜின் வீட்டுப் பூஜை அறையை அலங்கரித்து வருகின்றன. மேலும், ஒரு பொது விழாவில் “என் கலை வாரிசு பாக்யராஜ்தான்” என்று எம்.ஜி.ஆர் அறிவித்தது அன்றைய அரசியல் மற்றும் திரையுலகில் பெரும் பரபரப்பை ஏற்படுத்தியது. பாக்யராஜின் திரைப்படங்களில் ‘தூறல் நின்னு போச்சு’ திரைப்படம் எம்.ஜி.ஆருக்கு மிகவும் பிடித்த படமாகும். ஹிந்தி தயாரிப்பாளர் போனி கபூர் ஒருமுறை பாக்யராஜை ராஜ்கபூரிடம் அறிமுகப்படுத்தியபோது, ‘டார்லிங் டார்லிங் டார்லிங்’ திரைப்படத்தை பார்த்து மிகவும் ரசித்ததாக ராஜ்கபூர் பாராட்டியதும் பாக்யராஜை நெகிழ்ச்சியடையச் செய்தது.

நடிகர் சிவாஜி கணேசனையும், தனது குருநாதர் பாரதிராஜாவையும் தனது இயக்கத்தில் நடிக்க வைக்க வேண்டும் என்ற நீண்டநாள் ஆசையை ‘தாவணிக் கனவுகள்’ திரைப்படத்தின் மூலம் பாக்யராஜ் நிறைவேற்றிக் கொண்டார். அதேபோல், தனது நெருங்கிய நண்பரான நடிகர் ரஜினிகாந்தையும் இயக்க வேண்டும் என்ற விருப்பமும் அவருக்கு இருந்தது. கடவுள் நம்பிக்கை கொண்டிருந்தாலும், கோவிலுக்குச் செல்லும் பழக்கம் அதிகமாக இல்லாத பாக்யராஜ், தனது திருமண நாளன்று மட்டும் தவறாமல் கருமாரியம்மன் கோவிலுக்குச் சென்று வழிபடுவதை வழக்கமாகக் கொண்டிருந்தார்.

திரையுலகில் ஐம்பது ஆண்டுகளுக்கும் மேலாக சாதனை படைத்த கலைஞர்களில் பாக்யராஜும் ஒருவர். சமீபத்தில் அவரது ஐம்பது ஆண்டு திரைப்பயணத்தை கொண்டாடும் விழா நடைபெற்றது. அதில் ரஜினிகாந்த், இளையராஜா, மோகன் பாபு உள்ளிட்ட பல திரைப்பிரபலங்கள் கலந்து கொண்டு அவரை பாராட்டினர். சினிமாவைத் தாண்டி அரசியலிலும் கால்பதித்த அவர், ‘எம்.ஜி.ஆர் மக்கள் முன்னேற்றக் கழகம்’ என்ற கட்சியை தொடங்கினார். பின்னர் அரசியலில் எதிர்பார்த்த வெற்றியை பெற முடியாததால் அந்தக் கட்சியை கலைத்து அதிமுகவில் இணைந்தார். அதன் பிறகு கருத்து வேறுபாடு காரணமாக திமுகவில் இணைந்து தனது அரசியல் பயணத்தை தொடர்ந்தார்.

பாக்யராஜ் திரைப்படப் பட்டியல்:

1. 16 வயதினிலே – துணை நடிகர்

2. கிழக்கே போகும் ரயில் – துணை நடிகர், உதவி இயக்குநர்

3. சிகப்பு ரோஜாக்கள் – துணை நடிகர், வசனம்

4. புதிய வார்ப்புகள் – கதாநாயகன், வசனம்

5. கன்னிப் பருவத்திலே – துணை நடிகர், வசனம்

6. சுவரில்லாத சித்திரங்கள் – துணை நடிகர், கதை, திரைக்கதை, வசனம், இயக்கம்

7. பாமா ருக்மணி – கதாநாயகன், கதை, திரைக்கதை, வசனம்

8. ஒரு கை ஓசை – கதாநாயகன், கதை, திரைக்கதை, வசனம், இயக்கம், தயாரிப்பு

9. குமரிப் பெண்ணின் உள்ளத்திலே – கதாநாயகன்

10. மௌன கீதங்கள் – கதாநாயகன், கதை, திரைக்கதை, வசனம், இயக்கம்

11. இன்று போய் நாளை வா – கதாநாயகன், கதை, திரைக்கதை, வசனம், இயக்கம்

12. விடியும் வரை காத்திரு – கதாநாயகன், கதை, திரைக்கதை, வசனம், இயக்கம்

13. அந்த 7 நாட்கள் – கதாநாயகன், கதை, திரைக்கதை, வசனம், இயக்கம்

14. தூறல் நின்னு போச்சு – கதாநாயகன், கதை, திரைக்கதை, வசனம், இயக்கம்

15. பொய் சாட்சி – கதாநாயகன், கதை, திரைக்கதை, வசனம், இயக்கம்

16. டார்லிங் டார்லிங் டார்லிங் – கதாநாயகன், கதை, திரைக்கதை, வசனம், இயக்கம்

17. முந்தானை முடிச்சு – கதாநாயகன், கதை, திரைக்கதை, வசனம், இயக்கம்

18. சாட்டை இல்லாத பம்பரம் – கதை

19. விதி – துணை நடிகர்

20. அன்புள்ள ரஜினிகாந்த் – துணை நடிகர்

21. தாவணிக் கனவுகள் – கதாநாயகன், கதை, திரைக்கதை, வசனம், இயக்கம், தயாரிப்பு

22. ஒரு கைதியின் டைரி – கதை, வசனம்

23. நான் சிகப்பு மனிதன் – துணை நடிகர்

24. சின்ன வீடு – கதாநாயகன், கதை, திரைக்கதை, வசனம், இயக்கம்

25. கண்ணத் தொறக்கனும் சாமி – திரைக்கதை, வசனம்

26. எங்க சின்ன ராசா – கதாநாயகன், கதை, திரைக்கதை, வசனம், இயக்கம்

27. சின்னக்குயில் பாடுது – துணை நடிகர்

28. இது நம்ம ஆளு – கதாநாயகன், கதை, திரைக்கதை, வசனம், இசை

29. என் ரத்தத்தின் ரத்தமே – கதாநாயகன்

30. ஆராரோ ஆரிரரோ – கதாநாயகன், கதை, திரைக்கதை, வசனம், இயக்கம், இசை, தயாரிப்பு

31. அவசர போலீஸ் 100 – கதாநாயகன், கதை, திரைக்கதை, வசனம், இயக்கம்

32. பவுனு பவுனுதான் – கதாநாயகன், கதை, திரைக்கதை, வசனம், இயக்கம், இசை

33. ருத்ரா – கதாநாயகன்

34. ராசுக்குட்டி – கதாநாயகன், கதை, திரைக்கதை, வசனம், இயக்கம்

35. அம்மா வந்தாச்சு – கதாநாயகன்

36. சுந்தர காண்டம் – கதாநாயகன், கதை, திரைக்கதை, வசனம், இயக்கம், தயாரிப்பு

37. வீட்ல விஷேசங்க – கதாநாயகன், கதை, திரைக்கதை, வசனம், இயக்கம்

38. தாய்க்குலமே தாய்க்குலமே – கதை

39. ஒரு ஊர்ல ஒரு ராஜகுமாரி – கதாநாயகன், கதை, திரைக்கதை, வசனம், இயக்கம்

40. ஞானப்பழம் – கதாநாயகன், இசை

41. வேட்டிய மடிச்சு கட்டு – கதாநாயகன், கதை, திரைக்கதை, வசனம், இயக்கம், தயாரிப்பு

42. கபடி கபடி – கதை, திரைக்கதை, வசனம்

43. 12B – வசனம்

44. சொக்கத்தங்கம் – கதை, திரைக்கதை, வசனம், இயக்கம்

45. பாரிஜாதம் – துணை நடிகர், கதை, திரைக்கதை, வசனம், இயக்கம்

46. சம்திங் சம்திங் உனக்கும் எனக்கும் – துணை நடிகர்

47. ரெண்டு – துணை நடிகர்

48. நினைத்தாலே இனிக்கும் – துணை நடிகர்

49. உத்தமபுத்திரன் – துணை நடிகர்

50. சித்து ப்ளஸ் 2 – துணை நடிகர், கதை, திரைக்கதை, வசனம், இயக்கம், தயாரிப்பு

51. வாகை சூடவா – துணை நடிகர்

52. நினைத்தது யாரோ – துணை நடிகர்

53. துணை முதல்வர் – கதாநாயகன், கதை, திரைக்கதை, வசனம்

54. கணிதன் – துணை நடிகர்

55. வாய்மை – துணை நடிகர்

56. துப்பறிவாளன் – துணை நடிகர்

57. பொன்மகள் வந்தாள் – துணை நடிகர்

58. பிடி சார் – துணை நடிகர்

பிற மொழித் திரைப்படங்கள்:

1. ஏக் ஹி பூல் (ஹிந்தி) – கதை, திரைக்கதை

2. ராதா கல்யாணம் (தெலுங்கு) – கதை, திரைக்கதை

3. மூடு முல்லு (தெலுங்கு) – கதை, திரைக்கதை

4. வோ சாத் தின் (ஹிந்தி) – கதை, திரைக்கதை

5. மாஸ்டர்ஜீ (ஹிந்தி) – கதை, திரைக்கதை

6. ஆக்ரி ராஸ்தா (ஹிந்தி) – கதை, திரைக்கதை, இயக்கம்

7. சம்சாரட குட்டு (கன்னடம்) – கதை, திரைக்கதை

8. லவ் மாடி நோடு (கன்னடம்) – கதை, திரைக்கதை

9. சப்பல சென்னிங்கரயா (கன்னடம்) – கதை, திரைக்கதை

10. ஹல்லி மேஷ்ட்ரு (கன்னடம்) – கதை, திரைக்கதை

11. பேட்டா (ஹிந்தி) – கதை, திரைக்கதை

12. சுந்தரகாண்டா (தெலுங்கு) – கதை, திரைக்கதை

13. மனே தேவ்ரு (கன்னடம்) – கதை, திரைக்கதை

14. அன்னயா (கன்னடம்) – கதை, திரைக்கதை

15. கோபி கிஷன் (ஹிந்தி) – கதை, திரைக்கதை

16. ராஜா பாபு (ஹிந்தி) – கதை, திரைக்கதை

17. அந்தாஸ் (ஹிந்தி) – கதை, திரைக்கதை

18. மிஸ்டர் பேச்சரா (ஹிந்தி) – கதை, திரைக்கதை, இயக்கம்

19. ஜகத் கில்லாடி (கன்னடம்) – கதை, திரைக்கதை

20. படெல்லா (கன்னடம்) – கதை, திரைக்கதை

21. நானு நன்ன ஹெந்திரு (கன்னடம்) – கதை, திரைக்கதை

22. பா பா தி கிரேட் (ஹிந்தி) – கதை, திரைக்கதை, இயக்கம்

23. ரவி சாஸ்திரி (கன்னடம்) – கதை, திரைக்கதை