கடந்த 2016ஆம் ஆண்டு நடிகர் தினேஷ் நடிப்பில் வெளியான ‘ஒருநாள் கூத்து’ திரைப்படத்தின் மூலம் தமிழ் சினிமாவில் நடிகையாக அறிமுகமானவர் நிவேதா பெத்துராஜ். மதுரையை பூர்விகமாகக் கொண்ட அவர், தனது முதல் படத்திலேயே ரசிகர்களின் கவனத்தை ஈர்த்தார். அதனைத் தொடர்ந்து 2017ஆம் ஆண்டு நடிகர் உதயநிதி ஸ்டாலினுடன் இணைந்து ‘பொதுவாக எம்மனசு தங்கம்’ திரைப்படத்தில் நடித்தார். பின்னர் ‘மென்டல் மதிலோ’ திரைப்படத்தின் மூலம் தெலுங்கு திரையுலகிலும் அறிமுகமாகி, அங்கும் தனது நடிப்புத் திறமையை வெளிப்படுத்தினார்.
தெலுங்கில் அறிமுகமான பிறகும் தமிழ் சினிமாவில் தொடர்ந்து கவனம் செலுத்திய நிவேதா பெத்துராஜ், நடிகர் ரவி மோகனுடன் ‘டிக் டிக் டிக்’ திரைப்படத்திலும், விஜய் ஆண்டனியுடன் ‘திமிரு புடிச்சவன்’ திரைப்படத்திலும் நடித்தார். இதனைத் தொடர்ந்து பல்வேறு கதாபாத்திரங்களில் நடித்து தனது தனித்துவமான இடத்தை தக்க வைத்துக் கொண்டார். மேலும், 2019ஆம் ஆண்டு நடிகர் விஜய் சேதுபதி நடித்த ‘சங்க தமிழன்’ திரைப்படத்திலும் முக்கிய கதாபாத்திரத்தில் நடித்திருந்தார். தனது இயல்பான நடிப்பின் மூலம் தமிழ் மற்றும் தெலுங்கு ரசிகர்கள் மத்தியில் நல்ல வரவேற்பைப் பெற்ற நடிகைகளில் ஒருவராக அவர் விளங்கி வருகிறார்.
தமிழ் திரையுலகின் முன்னணி நடிகைகளில் ஒருவராக திகழும் நிவேதா பெத்துராஜ், சமீபத்தில் அளித்த பேட்டியில் தனது வாழ்க்கையில் எடுத்த மிக முக்கியமான முடிவு குறித்து மனம் திறந்து பேசியுள்ளார். அப்போது அவர் கூறுகையில், “2023ஆம் ஆண்டுடன் சினிமா வாழ்க்கைக்கு முழுமையாக விடை கொடுக்க வேண்டும் என்று நான் நினைத்திருந்தேன். அந்த காலகட்டத்தில் சினிமாவிலிருந்து விலகி வேறு ஒரு பாதையை தேர்வு செய்ய வேண்டும் என்ற எண்ணம் எனக்குள் இருந்தது. ஆனால் விதி எனக்கு முற்றிலும் எதிர்பாராத ஒரு திருப்பத்தை வழங்கியது” என்று தெரிவித்துள்ளார்.
மேலும் தனது அனுபவத்தை பகிர்ந்த அவர், “இயக்குநர் சிங்கீதம் சீனிவாச ராவின் ஒரு மிகப்பெரிய வெற்றிப்படத் திட்டத்தின் மூலம் மீண்டும் சினிமாவுடன் என்னை விதி இணைத்தது. என்னை மீண்டும் திரைத்துறைக்குள் கொண்டு வந்ததற்காக இயக்குநர் நாக் அஸ்வினுக்கு நான் மனமார்ந்த நன்றியை தெரிவிக்கிறேன். நாக் அஸ்வின் என்னை மீண்டும் சினிமாவுக்கு அழைத்து வரவில்லை என்றால், இந்த நேரத்தில் நான் இமயமலைப் பகுதிகளுக்கு சென்று வேறொரு வாழ்க்கைப் பயணத்தில் இருந்திருப்பேன்” என்று கூறியுள்ளார்.
நிவேதா பெத்துராஜின் இந்த மனம் திறந்த பேச்சு தற்போது ரசிகர்கள் மத்தியில் பெரும் கவனத்தை ஈர்த்துள்ளது. குறிப்பாக, சினிமாவை விட்டு விலகும் அளவுக்கு முடிவு செய்திருந்த அவர், மீண்டும் திரைத்துறையில் பயணிக்க காரணமான சம்பவங்களை பகிர்ந்திருப்பது ரசிகர்களிடையே பல்வேறு விவாதங்களை உருவாக்கியுள்ளது. அவரது இந்த கருத்துகள் சமூக வலைதளங்களிலும் வைரலாக பரவி வருகின்றன.
