வடசென்னை என்றாலே அடிதடி, வெட்டு, குத்து, ரத்தம், பகை, கொலை போன்ற வன்முறை சம்பவங்களையே தமிழ் திரைப்படங்களில் இதுவரை அதிகமாக சித்தரித்து வந்துள்ளனர். ஆனால், அந்த வழக்கமான சித்திரிப்புகளை முற்றிலும் தவிர்த்து, வடசென்னை மக்களின் இயல்பான வாழ்க்கை முறையையும் அவர்களின் உணர்வுகளையும் மையமாகக் கொண்டு உருவாகியுள்ள திரைப்படமாக ‘ஆல்பாஸ்’ அமைந்துள்ளது. இந்த திரைப்படம் குறித்து இயக்குநர் மைதீன் கூறுகையில், “இது குடும்ப உணர்வுகள் கலந்த கதைக்களம் கொண்ட திரைப்படம். வடசென்னையை மையமாக வைத்து இந்தக் கதை உருவாக்கப்பட்டிருப்பதால், சுமார் 45 நாட்கள் முழு படப்பிடிப்பும் வடசென்னை மற்றும் அதன் சுற்றுவட்டார பகுதிகளில் நடத்தப்பட்டது” என்று தெரிவித்துள்ளார்.
மேலும், ‘நிறங்கள் மூன்று’, ‘தருணம்’ போன்ற திரைப்படங்களில் நடித்திருந்த துஷ்யந்த் இந்த திரைப்படத்தில் கதாநாயகனாக நடித்துள்ளார். பிக்பாஸ் தமிழ் நிகழ்ச்சியின் மூலம் மக்களிடையே பிரபலமானதுடன், லியோ திரைப்படத்தில் முக்கிய கதாபாத்திரத்தில் நடித்திருந்த ஜனனி இந்த திரைப்படத்தில் கதாநாயகியாக நடித்துள்ளார்.
மேலும், பாண்டியநாடு மற்றும் எதிர்நீச்சல் போன்ற திரைப்படங்களின் மூலம் பிரபலமான சரத் லோகிதஷ்வா இந்த திரைப்படத்தில் வில்லன் கதாபாத்திரத்தில் நடித்துள்ளார். அதேபோல், Papanasam திரைப்படத்தில் வில்லனாக நடித்த ரோஷன் பஷீர் மற்றும் ‘பைசன்’ திரைப்படத்தில் உடற்கல்வி ஆசிரியராக நடித்த அருவி மதன் ஆகியோர் முக்கிய கதாபாத்திரங்களில் நடித்துள்ளனர். இந்த திரைப்படத்திற்கு ஜேம்ஸ் வசந்தன் இசையமைத்துள்ளார். மேலும், மோகன் ராஜன் பாடல் வரிகளை எழுதியுள்ளார்.
