விக்னேஷ் சிவன் மற்றும் பிரதீப் ரங்கநாதன் கூட்டணியில் உருவாகியுள்ள ‘லவ் இன்சூரன்ஸ் கம்பெனி’ திரைப்படத்தில் எஸ்.ஜே.சூர்யா, கீர்த்தி ஷெட்டி மற்றும் சீமான் ஆகியோர் முக்கிய கதாபாத்திரங்களில் நடித்துள்ளனர். இந்தப் படத்தின் ப்ரீ-ரிலீஸ் நிகழ்ச்சி சென்னையில் நடைபெற்றது. இதில் கலந்து கொண்டு பேசிய பிரதீப் ரங்கநாதன் தனது ரசிகர்களுக்கு நன்றி தெரிவித்தார்.
அவர் பேசுகையில், “விக்னேஷ் சிவன் பணியாற்றும் முறையை புரிந்து கொள்வதற்கு எனக்கு சில காலம் எடுத்துக்கொண்டது. ஆனால் கடந்த இரண்டு ஆண்டுகளில் அவர் எவ்வளவு நுணுக்கமாகவும் துல்லியமாகவும் செயல்படுகிறார் என்பதை புரிந்து கொண்டு அவரை மிகவும் மதிக்கத் தொடங்கியுள்ளேன்.
ஒரு இயக்குநராகவும், குறிப்பாக பாடல் வரிகள் மற்றும் வசனங்களில், அவர் தனது தனித்துவமான பாணியின் மூலம் வேறுபட்டு விளங்குகிறார். அவரது பாடல்கள் எப்போதும் சிறப்பாக அமையும். அவரது இசை பற்றிய அறிவு என்னை ஆச்சரியப்படுத்துகிறது. அவரது சொற்களும் இசையும் பார்வையாளர்களிடம் ஏற்படுத்தும் தாக்கத்தை காண நான் ஆவலாக இருக்கிறேன்.
‘ரசிகர்கள்’ என்ற சொல்லை உச்சரிக்கும்போது எனக்கு முன்பு ஒரு தயக்கம் இருந்தது. என் பயணத்தின் இந்த நிலையில் எனக்கு உண்மையாக ரசிகர்கள் உள்ளனரா என்ற சந்தேகம் ஏற்பட்டது. சிலர் அதைப் பற்றி கேலி செய்யக்கூடும் என்ற எண்ணமும் இருந்தது.ஆனால் இணையத்திலும் வெளியிலும் என்மீது அவர்கள் காட்டும் அன்பு உண்மையில் வியப்பூட்டுகிறது. எனவே இனி தயக்கம் இல்லாமல் சொல்லுகிறேன். என் ரசிகர்களே, உங்களின் அன்புக்கும் ஆதரவுக்கும் என் மனமார்ந்த நன்றி. நீங்கள் இல்லையெனில் நான் இல்லை” என்று தெரிவித்தார்.
