நாக் அஸ்வின் இயக்கத்தில் உருவாகும் “கல்கி 2898 ஏடி” திரைப்படத்தில் பிரபாஸ், கமல்ஹாசன், அமிதாப்பச்சன், தீபிகா படுகோனே மற்றும் திஷா பதானி ஆகியோர் முக்கிய கதாபாத்திரங்களில் நடித்துள்ளனர். இந்த படம் ரூ.600 கோடி பட்ஜெட்டில் புராண காலத்தையும் நிகழ்காலத்தையும் இணைத்து, அறிவியல் கலந்த கதை கொண்டதாக உருவாகியுள்ளது. வைஜெயந்தி மூவீஸ் தயாரிக்கும் இந்த படத்திற்கு சந்தோஷ் நாராயணன் இசையமைத்துள்ளார்.
ஜூன் 27 அன்று படம் திரைக்கு வரவுள்ளது.படத்தில் பிரபாஸ் பைரவா எனும் கதாபாத்திரத்தில் நடித்துள்ளார். அமிதாப்பச்சன் அஸ்வத்தாமாவாகவும், கமல்ஹாசன் வில்லனாகவும் நடித்திருப்பதாக தகவல்கள் தெரிவிக்கின்றன.படத்தில் புஜ்ஜி ரோபோ என்ற புதிய கதாபாத்திரம் அறிமுகமாகி உள்ளது. இந்த ரோபோவுக்கு கீர்த்தி சுரேஷ் குரல் கொடுத்துள்ளார். மேலும், நவீன தொழில்நுட்பத்தை பயன்படுத்தி புதிய கார் வடிவமைக்கப்பட்டுள்ளது, இதனை கோவையின் என்ஜினீயர்கள் உருவாக்கியுள்ளனர்.
புஜ்ஜி கார் அறிமுக விழா ஐதராபாத் ராமோஜி பிலிம் சிட்டியில் நேற்று மாலை நடைபெற்றது. பல்லாயிரக்கணக்கான ரசிகர்கள் மத்தியில் பிரபாஸ் அந்த காரை ஓட்டி வந்து அறிமுகப்படுத்தினார், இதைக் கண்டு ரசிகர்கள் ஆரவாரம் செய்து கொண்டாடினர்.விழாவில் பிரபாஸ் பேசுகையில், “படத்தில் நடித்த அனைவருக்கும் நன்றி. அமிதாப்பச்சன் மற்றும் கமல்ஹாசன் போன்ற ஜாம்பவான்களுடன் பணிபுரிந்தது மிகுந்த மகிழ்சியாக உள்ளது.
அவர்களின் உத்வேகம் ஊக்கம் அளிக்கிறது. அமிதாப்பச்சனின் பாரம்பரியம் மற்றும் கமல்ஹாசனின் சிறந்த நடிப்பு திறமை ஆகியவை சினிமாவில் எனது கனவை வடிவமைத்தன. தீபிகா படுகோனே சர்வதேச அளவில் சிறந்த நடிகையாக உள்ளார். திஷா பதானி இளைஞர்களிடையே மிகவும் பிரபலமாக இருக்கிறார். திரைப்படத் தயாரிப்பாளர்களின் ஆர்வமும் அர்ப்பணிப்பும் பாராட்டுக்குரியது. கமல்ஹாசனின் படைப்புகளால் சிறு வயதிலேயே ஈர்க்கப்பட்டேன். அவை என்னை மிகவும் பாதித்தது. எனது சினிமா ஆசையை மேலும் தூண்டியது” என்றார்.
