இயக்குனர் ராஜ்குமார் பெரியசாமி இயக்கத்தில், நடிகர் சிவகார்த்திகேயன் மற்றும் நடிகை சாய் பல்லவி நடித்த ‘அமரன்’ திரைப்படம் தீபாவளி நாளில் வெளியானது. மறைந்த ராணுவ வீரர் மேஜர் முகுந்த் வரதராஜனின் வாழ்க்கையை மையமாகக் கொண்டு உருவாக்கப்பட்டுள்ள இத்திரைப்படத்தில், சிவகார்த்திகேயன் முகுந்த் வரதராஜன் கதாபாத்திரத்தில் நடிக்க, சாய் பல்லவி அவரது மனைவி இந்து ரெபேக்கா கதாபாத்திரத்தில் நடித்துள்ளார்.
திரைப்படம் வெளியான பிறகு மூன்று நாட்களில் உலகளவில் 100 கோடி ரூபாயைத் தாண்டிய அளவுக்கு வசூலித்துள்ளது. இதைப் பார்த்து பல திரைப்பிரபலங்களும் அரசியல் பிரமுகர்களும் படத்திற்கு பாராட்டு தெரிவித்து வருகின்றனர்.
அந்த வரிசையில், நடிகர் எஸ்.ஜே சூர்யா, இப்படத்தைப் பார்த்துவிட்டு தனது எக்ஸ் தளத்தில் பாராட்டி பதிவிட்டுள்ளார். அவர் பதிவில், இது அனைவரும் கண்டிப்பாக பார்க்க வேண்டிய திரைப்படம் என்றும், படத்தில் நடித்த சிவகார்த்திகேயன், சாய் பல்லவி, இயக்குனர் ராஜ்குமார் பெரியசாமி மற்றும் தயாரிப்பாளர் கமல்ஹாசனுக்கு பாராட்டுத் தெரிவித்து உள்ளார். சிவகார்த்திகேயன் நடித்த ‘டான்’ படத்திலும் எஸ்.ஜே சூர்யா முக்கிய கதாபாத்திரத்தில் நடித்தது குறிப்பிடத்தக்கது.
