கவுதம் கார்த்திக் நடித்த ‘ரங்கூன்’ திரைப்படத்தை இயக்கிய ராஜ்குமார் பெரியசாமி, அதனைத் தொடர்ந்து சிவகார்த்திகேயன் நடிப்பில் ‘அமரன்’ திரைப்படத்தை இயக்கினார். இந்த படம் ₹300 கோடிக்கு மேல் வசூலித்த பெரும் வெற்றி பெற்றது. இதற்குப் பிறகு, தனுஷின் 55வது படத்தை இயக்கப்போவதாக அதிகாரப்பூர்வமாக அறிவித்திருந்தார். இந்த படத்திற்கான பூஜை சமீபத்தில் மகா சிவராத்திரி தினத்தில் நடத்தப்பட்டது. எனினும், இதுவரை படப்பிடிப்பு தொடங்கப்படவில்லை.
இந்த நிலையில், இயக்குநர் ராஜ்குமார் பெரியசாமி இப்படத்தின் கதை மற்றும் படப்பிடிப்பு குறித்து புதிய தகவல்களை பகிர்ந்துள்ளார். அவர் கூறியதாவது: ‘‘தனுஷ் 55’’ திரைப்படத்தின் முன்பதிவுப் பணிகள் தற்போது நடைபெற்று வருகின்றன. மேலும் 5 அல்லது 6 மாதங்களில் படப்பிடிப்பு தொடங்கும் திட்டம் உள்ளது. இந்த படம் நம்முடைய அன்றாட வாழ்க்கையில் இருந்து கொண்டிருக்கும் மனிதர்களை பற்றிய கதை.
ஆனால் அவர்கள் இருப்பதை நாம் உணர்வதே இல்லை. நம் வாழ்க்கை இயல்பாகவும் அமைதியாகவும் நடந்து கொண்டே இருக்கச் செய்யும் இந்த மக்கள்தான் உண்மையான தூண்கள். இவர்களைப் பற்றி பேசும் படமாகவே இது அமையும். இப்படியாக அவர் கூறியுள்ளார்.
