தமிழ் திரைப்பட உலகில் முன்னணி நடிகராக திகழ்பவர் கார்த்தி. இவரது நடிப்பில் சமீபத்தில் வெளியான ‘மெய்யழகன்’ திரைப்படம் நல்ல வரவேற்பை பெற்றது. அந்த வெற்றியின் தொடர்ச்சியாக கார்த்தி, நலன் குமாரசாமி இயக்கும் ‘வா வாத்தியார்’ படத்திலும், பி.எஸ். மித்ரன் இயக்கும் ‘சார்தார் 2’ படத்திலும் நடித்து வருகிறார்.
இந்நிலையில், ‘டாணாக்காரன்’ படத்தை இயக்கிய தமிழ் இயக்கத்தில் கார்த்தி தனது 29வது திரைப்படத்தில் நடிக்க உள்ளார். இந்தப் படத்தை ‘டிரீம் வாரியர் பிக்சர்ஸ்’ நிறுவனம் தயாரிக்கிறது. கடலை மையமாகக் கொண்ட வெறித்தனமான கேங்ஸ்டர் கதையை அடிப்படையாகக் கொண்டு இந்த படம் உருவாகவுள்ளது. இப்படத்திற்கு ‘மார்ஷல்’ என தலைப்பு வைக்கப்பட்டுள்ளது. இசையமைப்பாளராக சாய் அபயங்கர் பணியாற்றுகிறார்.
இந்த படத்தில் பிரபல தெலுங்கு நடிகரான நானி சிறிய காட்சி (கேமியோ) ஒன்றில் நடித்திருப்பதாக தகவல்கள் வெளியாகியுள்ளன. மேலும் வில்லன் கதாபாத்திரத்தில் நிவின் பாலி மற்றும் கதாநாயகியாக கல்யாணி பிரியதர்ஷனும் நடிக்கவிருக்கிறார்கள். சமீபத்தில் இப்படத்தின் பூஜை நடைபெற்றது. அதையடுத்துப் பூஜை நிகழ்வுக்கான புகைப்படங்கள் இணையத்தில் வைரலாக பரவி, அதன் பின்னர் படக்குழு மார்ஷல் திரைப்படத்தின் பூஜை வீடியோவையும் வெளியிட்டுள்ளது.
