தனுஷ் இயக்கத்தில் நான்காவது படமாக உருவானது ‘இட்லி கடை’. இது தனுஷின் 52-வது திரைப்படமாகும். தனுஷ் இயக்கி நடித்துள்ள இத்திரைப்படத்திற்கு இசையமைப்பாளர் ஜி.வி. பிரகாஷ் இசையமைத்துள்ளார். இப்படத்தை டான் பிக்சர்ஸ் நிறுவனம் தயாரித்துள்ளது.
இந்த படத்தில் நித்யா மேனன், ஷாலினி பாண்டே, அருண் விஜய், சத்யராஜ், ராஜ்கிரண் உள்ளிட்டோர் நடித்துள்ளனர். ‘இட்லி கடை’ நேற்று முதல் திரையரங்குகளில் வெளியாகி, ரசிகர்களிடையே நல்ல வரவேற்பைப் பெற்றுள்ளது. மேலும், இப்படம் வெளியான முதல் நாளிலேயே நல்ல வசூல் குவித்துள்ளதாக தகவல்கள் வெளியாகியுள்ளன. இனிவரும் நாட்களில் இப்படம் மேலும் வசூலை குவிக்கும் என எதிர்பார்க்கப்படுகிறது.
இதனிடையே, ‘இட்லி கடை’ படம் எப்போது ஓ.டி.டி. தளத்தில் வெளியாகும் என ரசிகர்கள் கேள்வி எழுப்ப ஆரம்பித்துள்ளனர். அதன்படி, ‘இட்லி கடை’ படத்தின் ஓ.டி.டி உரிமத்தை நெட்பிளிக்ஸ் தளம் பெற்றுள்ளது என்றும் நவம்பர் மாதத்தில் இப்படம் ஓ.டி.டி தளத்தில் வெளியாகும் என தகவல் வெளியாகியுள்ளது.
