ஆதிக் ரவிச்சந்திரன் இயக்கத்தில், ஜி.வி. பிரகாஷ் குமார் இசையமைப்பில், அஜித் குமார், த்ரிஷா உள்ளிட்ட பலர் நடித்த குட் பேட் அக்லி படத்தில், இளையராஜா இசையில் வெளிவந்த சூப்பர்ஹிட் பாடல்களான ஒத்த ரூபாயும் தாரேன், இளமை இதோ இதோ, என் ஜோடி மஞ்சக் குருவி ஆகிய பாடல்கள் பயன்படுத்தப்பட்டிருந்தன.
தனது அனுமதி இல்லாமல் அந்தப் பாடல்களை பயன்படுத்தியதாகக் கூறி, இளையராஜா நீதிமன்றத்தில் வழக்கு தொடர்ந்தார். இதனால் அந்தப் பாடல்களை பயன்படுத்தக் கூடாது என்று நீதிமன்றம் இடைக்காலத் தடை விதித்தது. ஆனால், ஓடிடி தளத்தில் வெளியாகியிருந்த குட் பேட் அக்லி படத்தில், அனுமதி பெறாத அந்தப் பாடல்கள் நீக்கப்படாமல் இருந்தன.
இதனால், உயர்நீதிமன்ற உத்தரவை அமல்படுத்தாத நிலையில், தயாரிப்பு நிறுவனத்திற்கு எதிராக நீதிமன்ற அவமதிப்பு வழக்கு தொடருவோம் என இளையராஜா தரப்பிலிருந்து வக்கீல் நோட்டீஸ் அனுப்பப்பட்டது. இதனையடுத்து தற்போது நெட்பிளிக்ஸ் ஓடிடி தளத்தில் அந்தப் படமே நீக்கப்பட்டுள்ளது.
