1990-களின் மதுரையை பின்னணியாக வைத்து கார்த்திக் சுப்புராஜ் இயக்கியுள்ள திரைப்படம் ‘டோரதி’ . ரிஷிகாந்த், சனந்த், கீர்த்தி சுரேஷ் உள்ளிட்டோர் நடித்துள்ள இப்படத்திற்கு இளையராஜா இசையமைத்துள்ளார். நட்பு, வன்முறை, காதல் என வெவ்வேறு உணர்வுகளை மையமாகக் கொண்டு கதை நகர்கிறது.
சிறுவயதில் இருந்தே நெருங்கிய நண்பர்களாக இருக்கும் கார்த்திக் மற்றும் சுப்பு, காலப்போக்கில் வன்முறை நிறைந்த சூழலில் சிக்கிக் கொள்கிறார்கள். எதிர்பாராத ஒரு சம்பவம் இருவரையும் பிரிக்கிறது. பல ஆண்டுகளுக்குப் பிறகு, சுப்புவை கொல்ல வேண்டும் என்பதற்காக அவனது தந்தை கார்த்திக்கையே அணுகுகிறார். நண்பனை கொல்வதா அல்லது அவன் இருக்கும் சூழ்நிலையை புரிந்துகொள்வதா என்ற குழப்பம் கார்த்திக்குள் உருவாக, அங்கிருந்து கதை வேகமெடுக்கிறது.
படத்தின் மிகப்பெரிய பலமாக இளையராஜாவின் இசை அமைந்துள்ளது. கதாபாத்திரங்களின் வன்முறை, நட்பு, காதல் உள்ளிட்ட உணர்வுகளுக்கு ஏற்ற வகையில் பின்னணி இசை காட்சிகளின் தாக்கத்தை அதிகரிக்கிறது. திருமணம் மற்றும் கிராமியப் பாடல்களின் இசைக்கோர்வையும் கவனம் பெறுகிறது. குறிப்பிட்ட ஒரு முக்கியமான காட்சியில் இளையராஜாவின் குரல் பயன்படுத்தப்பட்டிருப்பதும் அந்த தருணத்தின் உணர்வை மேலும் அழுத்தமாக்குகிறது.
கார்த்திக் மற்றும் சுப்பு கதாபாத்திரங்களில் நடித்துள்ள ரிஷிகாந்த், சனந்த் இருவரும் உடல்மொழியிலும் நடிப்பிலும் நல்ல வேறுபாட்டை காட்டியுள்ளனர். இருவருக்கும் இடையிலான நட்பு மற்றும் மோதல் காட்சிகள் அழுத்தமாக பதிவாகியுள்ளன. குறுகிய நேரமே தோன்றினாலும் கீர்த்தி சுரேஷின் கதாபாத்திரம் கதையில் முக்கியமான மாற்றத்தை ஏற்படுத்துகிறது. குறிப்பாக அவர் இடம்பெறும் சிங்கிள் ஷாட் காட்சி பதற்றத்தை சிறப்பாக கடத்துகிறது.
முதல் பாதியில் வித்தியாசமான கதைக்களத்துடன் படம் சுவாரஸ்யமாக நகர்கிறது. ஆனால் இடைவேளைக்குப் பிறகு திரைக்கதை வேறு திசையை நோக்கி செல்கிறது. தன்பாலின ஈர்ப்பு போன்ற முக்கியமான விஷயத்தை கதைக்குள் கொண்டு வந்திருக்கும் விதம் சில இடங்களில் இயல்பாக இல்லாமல் செயற்கையாக தெரிகிறது. மேலும் கிளைமேக்ஸில் அதிர்ச்சியை ஏற்படுத்த வேண்டும் என்ற முயற்சி, சில குழப்பங்களையும் உருவாக்குகிறது.மொத்தத்தில், வன்முறையை பின்னணியாகக் கொண்ட நட்புக் கதையாக தொடங்கும் ‘டோரதி’, சில வித்தியாசமான விஷயங்களை பேச முயற்சிக்கிறது. ஆனால் திரைக்கதையில் இன்னும் கவனம் செலுத்தியிருந்தால் அதன் தாக்கம் அதிகமாக இருந்திருக்கும். ஒருமுறை பார்க்கக்கூடிய படமாக ‘டோரதி’ அமைந்துள்ளது.
