நடிகர் கவின் நடிப்பில் வெளியாகி வெற்றிபெற்ற ‘டாடா’ திரைப்படத்தை இயக்கியவர் கணேஷ் கே. பாபு. தற்போது அவர் கதை, வசனம் மற்றும் தயாரிப்பில் உருவாகியுள்ள புதிய திரைப்படம் ‘டார்க்’. இந்தப் படத்தை அவரது நண்பர் கல்யாண் இயக்கியுள்ளார். இதில் அஜய்கார்த்தி, அஞ்சனா, நட்டி உள்ளிட்ட பலர் நடித்துள்ளனர். மேலும், மறைந்த இயக்குநரும் நடிகருமான கே. பாக்யராஜும் இந்த திரைப்படத்தில் முக்கிய கதாபாத்திரத்தில் நடித்துள்ளார்.
கே. பாக்யராஜ் குறித்து தனது நினைவுகளை பகிர்ந்த கணேஷ் கே. பாபு கூறுகையில், “நான் இயக்கிய ‘டாடா’ திரைப்படத்தில் பாக்யராஜ் சார் கதாநாயகனின் தந்தையாக நடித்திருந்தார். அப்போது எனது ஆர்வத்தின் காரணமாக அவருக்கு அதிகமான வசனங்களை எழுதி கொடுத்தேன். அந்தக் காட்சிகளில் அவர் இப்படித்தான் நடிக்க வேண்டும், அப்படித்தான் பேச வேண்டும் என்று பல எதிர்பார்ப்புகளுடன் இருந்தேன். ஆனால், தனது பல ஆண்டுகால அனுபவத்தின் மூலம் அந்த வசனங்களையும், நடிப்பையும் மேலும் மெருகேற்றி சிறப்பாக வெளிப்படுத்தினார். அதை பார்த்தபோது எனக்கே ஆச்சரியமாக இருந்தது. அந்த திரைப்படம் வெற்றி பெற அவரது நடிப்பும் முக்கிய காரணங்களில் ஒன்றாக அமைந்தது.
‘டார்க்’ திரைப்படத்தில் கதாநாயகி அஞ்சனாவின் தந்தையாக அவர் நடித்துள்ளார். இயக்குநர் கல்யாண் அவரிடம் கதை சொல்லச் செல்லும்போது, ‘நீ கதையை மட்டும் சொல்லு, மற்றதை பாக்யராஜ் சார் பார்த்துக்கொள்வார்’ என்று நான் கூறினேன். அதேபோலவே நடந்தது. படப்பிடிப்பு முழுவதும் தனது அனுபவத்தால் அனைவரையும் கவர்ந்தார். தனது டப்பிங் பணியையும் முழுமையாக முடித்துவிட்டார். ஆனால், படம் வெளியாகும் முன்பே அவர் காலமானது மிகவும் வேதனையாக இருக்கிறது.
படப்பிடிப்பு நடைபெற்றுக் கொண்டிருந்த ஒரு நாளில், அவர் அணிந்திருந்த செருப்பால் காலில் வலி இருப்பதாக கூறினார். உடனே நான் ஓடிச் சென்று அவருக்குப் புதிய செருப்பு வாங்கி வந்து, என் கையாலேயே அணிவித்தேன். அந்த தருணத்தை என் வாழ்க்கையின் மிகப்பெரிய பாக்கியமாக நான் கருதுகிறேன். வரும் ஜூலை 3-ஆம் தேதி ‘டார்க்’ திரைப்படம் வெளியாகிறது. பாக்யராஜ் சார் மறைவுக்குப் பிறகு வெளியாகும் முதல் திரைப்படம் என்பதால், இந்தப் படத்தை அவருக்கு சமர்ப்பணம் செய்கிறோம். திரைப்படத்தின் தொடக்கத்திலும் அவருக்கு இரங்கல் தெரிவிக்கும் சிறப்பு வாசகம் இடம்பெற்றுள்ளது,” என்று நெகிழ்ச்சியுடன் தெரிவித்துள்ளார்.
மறைந்த கே. பாக்யராஜ் நடித்த திரைப்படங்களில் கடைசியாக வெளியான படம் ‘டார்க் ஜெயண்ட்’ ஆகும். அந்தப் படத்தில் அவர் சாமியார் கதாபாத்திரத்தில் நடித்திருந்தார். சுவாரஸ்யமாக, அந்தப் படத்திலும், தற்போது வெளியாகவுள்ள ‘டார்க்’ திரைப்படத்திலும் தலைப்பில் ‘டார்க்’ என்ற வார்த்தை இடம்பெற்றுள்ளது. மேலும், அவர் நடித்துள்ள இன்னும் சில திரைப்படங்கள் தற்போது வெளியீட்டிற்குத் தயாராக இருப்பதும் குறிப்பிடத்தக்கது.
