தேயிலைத் தோட்டங்கள் சூழ்ந்த மலைப்பகுதியில் அமைந்துள்ள ஒரு காவல் நிலையத்திற்கு இன்ஸ்பெக்டராக பணியமர்த்தப்படுகிறார் இசக்கி கார்வண்ணன். அந்த பகுதியில் எந்தவித குற்றச் சம்பவங்களும் நடைபெறாமல் இருப்பது அவருக்கு ஆரம்பத்திலேயே ஆச்சரியத்தை ஏற்படுத்துகிறது. இதற்கிடையில், அந்த கிராமத்திற்கு ஆசிரியராக புதிதாக வரும் பிரவீன் பழனிசாமி மர்மமான சூழ்நிலையில் கொலை செய்யப்படுகிறார். இந்த கொலை வழக்கை விசாரிக்கத் தொடங்கும் இசக்கி கார்வண்ணன், பெண்களுக்கு எதிராக குற்றங்களில் ஈடுபடுபவர்களை முகமூடி அணிந்த ஐந்து பேர் கொண்ட மர்மக் குழு கொடூரமாகக் கொலை செய்து வருவதை கண்டுபிடிக்கிறார். அந்த குழுவினர் யார்? அவர்கள் ஏன் இவ்வாறு செயல்படுகின்றனர்? ஆசிரியர் கொலைக்கும் அவர்களுக்கும் என்ன தொடர்பு உள்ளது? என்பதற்கான பதில்களே படத்தின் மீதிக்கதையாக அமைந்துள்ளது.
காவல்துறை அதிகாரி கதாபாத்திரத்தில் நடித்துள்ள இசக்கி கார்வண்ணன், தனது கதாபாத்திரத்திற்குத் தேவையான அமைதியான மற்றும் கட்டுப்படுத்தப்பட்ட நடிப்பை வழங்கியுள்ளார். இருப்பினும், கதையின் மையக் கதாநாயகனாக இருந்தபோதிலும் அவருக்கான முக்கிய காட்சிகளும் நடிப்புத் திறனை வெளிப்படுத்தும் தருணங்களும் குறைவாக இருப்பது ஏமாற்றத்தை ஏற்படுத்துகிறது. நடிகை அபி நட்சத்திரா திரைப்படத்தில் பரிச்சயமான முகமாக ரசிகர்களின் கவனத்தை ஈர்க்கிறார். அவரது அறிமுகக் காட்சிகள் மற்றும் கதாபாத்திரத்திற்காக உருவாக்கப்பட்ட பில்ட்அப் ஆகியவை பெரிய எதிர்பார்ப்பை ஏற்படுத்தினாலும், கதையின் முக்கிய திருப்புமுனைகளில் அவரது கதாபாத்திரம் எதிர்பார்த்த தாக்கத்தை ஏற்படுத்தத் தவறுவது படத்தின் குறையாக மாறியுள்ளது.
கொலை செய்யப்படும் ஆசிரியர் கதாபாத்திரத்தில் நடித்துள்ள பிரவீன் பழனிசாமி, குறைந்த நேரமே திரையில் தோன்றினாலும் தனது நடிப்பின் மூலம் கவனத்தை ஈர்க்கிறார். மறைந்த நடிகர் செல்வகுமார் காவல்துறை அதிகாரி வேடத்தில் வந்து ரசிகர்களை கவர்கிறார். காதல் சுகுமார் இடம்பெறும் நகைச்சுவை காட்சிகள் பெரிதாக தாக்கத்தை ஏற்படுத்தவில்லை. மற்ற கதாபாத்திரங்களில் நடித்திருக்கும் நடிகர்களும் தங்களுக்கு வழங்கப்பட்ட பணியை திருப்திகரமாகச் செய்துள்ளனர்.
1970-களின் காலகட்டத்தை பின்னணியாகக் கொண்டு, ஒரு மலைவாழ் கிராமத்தை மையமாக வைத்து இயக்குநர் கிட்டு இந்த திரைப்படத்தை உருவாக்கியுள்ளார். பெண்களுக்கு எதிராக நடைபெறும் அநீதிகள், அதற்கு எதிராக போராடும் பெண்களின் வலிமை, ஒரு மர்மமான கொலை மற்றும் அதன் பின்னணியில் மறைந்து கிடக்கும் ரகசியங்கள் ஆகியவற்றை மையமாக வைத்து கதை நகர்கிறது. சில இடங்களில் சுவாரஸ்யமாக நகரும் திரைக்கதை, பல இடங்களில் தேவையற்ற குழப்பத்தையும் உருவாக்குகிறது.
திரைப்படத்தின் முதல் பாதி முழுவதும் மர்மம் நிறைந்த சூழலை உருவாக்குவதில் கவனம் செலுத்தப்பட்டிருந்தாலும், திரைக்கதை மிகவும் மெதுவாக நகர்வது ரசிகர்களின் பொறுமையை சோதிக்கிறது. இரண்டாம் பாதியிலும் பல கேள்விகளுக்கு தெளிவான பதில்கள் வழங்கப்படாமல் விடப்பட்டுள்ளது. குறிப்பாக கிளைமாக்ஸ் பகுதியில் முக்கியமான விஷயங்களுக்கு விளக்கம் அளிக்காமல், இரண்டாம் பாகத்திற்கான முன்னோட்டத்துடன் படம் முடிவடைவது ஏமாற்றத்தை ஏற்படுத்துகிறது. ஒளிப்பதிவாளர் சிபி, மலைப்பகுதியின் இயற்கை அழகை மிக நேர்த்தியாக பதிவு செய்துள்ளார். இசையமைப்பாளர் தீசனின் பின்னணி இசை சில காட்சிகளில் கதைக்கு வலுசேர்த்தாலும், பெரிய அளவிலான தாக்கத்தை ஏற்படுத்தவில்லை.
—
