இந்தி திரையுலகின் திறமையான நடிகர்களில் ஒருவரான மனோஜ் பாஜ்பாய், தற்போது ‘கவர்னர்: தி சைலன்ட் சேவியர்’ திரைப்படத்தில் முக்கிய கதாபாத்திரத்தில் நடித்துள்ளார். சின்மே டி மண்ட்லேகர் இயக்கியுள்ள இப்படத்தில் அடா சர்மா, மதுபாலா உள்ளிட்டோர் நடித்துள்ளனர். 1990களில் இந்தியா சந்தித்த அரசியல் மற்றும் பொருளாதார நெருக்கடியை மையமாகக் கொண்டு உருவாகியுள்ள இப்படம் வரும் ஜூன் 12ஆம் தேதி திரையரங்குகளில் வெளியாக உள்ளது.
படம் குறித்து பேசிய மனோஜ் பாஜ்பாய், “இந்தப் படத்தில் என்னை மிகவும் கவர்ந்தது கதாநாயகனின் அமைதியான குணநலன்தான். பொதுவாக ஹீரோக்கள் ஆயுதங்களுடன் போராடுவார்கள். ஆனால் இந்தக் கதாபாத்திரம் ஞானம், பொறுமை மற்றும் பொறுப்புணர்வு ஆகியவற்றின் மூலம் சவால்களை எதிர்கொள்கிறார். ஒரு நாட்டின் எதிர்காலம் அவரது முடிவுகளைச் சார்ந்திருக்கும் சூழலை படம் சித்தரிக்கிறது. இப்படிப்பட்ட கதாபாத்திரம் ஒரு நடிகருக்கு அரிதாகவே கிடைக்கும்” என்றார்.
மேலும், “ஒரு கவர்னரின் மனநிலையையும், அவர் எதிர்கொள்ளும் உளவியல் அழுத்தங்களையும் உணர்ந்து நடித்தது மிகப்பெரிய சவாலாக இருந்தது. கதாபாத்திரத்தின் தோற்றத்தை விட, அதன் உணர்வுகளையும் மனப்பயணத்தையும் புரிந்துகொள்வதில் அதிக கவனம் செலுத்தினேன்” என தெரிவித்தார்.
இளம் நடிகர்களுக்கு அறிவுரை வழங்கிய அவர், “வெற்றியைத் தேடி ஓட வேண்டாம். திறமையை வளர்த்துக்கொள்ளுங்கள். வெற்றி தற்காலிகமானது, ஆனால் திறமை வாழ்நாள் முழுவதும் உங்களுடன் இருக்கும். தினமும் உங்கள் கலைத்திறனை மேம்படுத்துவதில் கவனம் செலுத்துங்கள்” என்றார். மேலும், “வெளியாளராக இருந்த அனுபவம்தான் எனக்குள் பசி, ஆர்வம் மற்றும் மன உறுதியை உருவாக்கியது. அதுவே இன்று வரை என்னை முன்னேறச் செய்துள்ளது” என்றும் கூறினார்.
