‘பசங்க’ திரைப்படத்தின் மூலம் இயக்குநராக அறிமுகமான பாண்டிராஜ், தொடர்ந்து ‘வம்சம்’, ‘மெரினா’, ‘கேடி பில்லா கில்லாடி ரங்கா’ உள்ளிட்ட பல வெற்றித் திரைப்படங்களை இயக்கி தமிழ் சினிமாவில் தனக்கென ஒரு இடத்தைப் பிடித்தார். குடும்பம் மற்றும் நகைச்சுவை கலந்த கதைகளை ரசிகர்களிடம் எளிதாக கொண்டு சேர்க்கும் திறமையால் அவர் தனித்துவமான இயக்குநராக அறியப்படுகிறார். பாண்டிராஜ் இயக்கத்தில் சமீபத்தில் வெளியான ‘தலைவன் தலைவி’ திரைப்படமும் ரசிகர்களிடையே நல்ல வரவேற்பைப் பெற்று, ரூ.100 கோடிக்கும் அதிகமான வசூலைப் பெற்று வெற்றிப்படமாக அமைந்தது.
இந்த நிலையில், தற்போது அவர் இயக்கியுள்ள புதிய திரைப்படம் ‘பரிமளா & கோ’. இந்தப் படத்தில் ஜெயராம், ஊர்வசி, சஞ்சனா கிருஷ்ணமூர்த்தி, மிஷ்கின், சாண்டி, யோகி பாபு, சந்தோஷ் சோபன், அனந்திகா உள்ளிட்ட பலரும் முக்கிய கதாபாத்திரங்களில் நடித்துள்ளனர். ஜியார்ஜி சி வில்லியம்ஸ் இந்தப் படத்திற்கு ஒளிப்பதிவு செய்துள்ளார். முழுக்க முழுக்க நகைச்சுவை கதைக்களத்தை மையமாகக் கொண்டு உருவாகியுள்ள இந்த திரைப்படத்தை லைகா புரொடக்ஷன்ஸ் நிறுவனம் தயாரித்துள்ளது.
வருகிற ஜூன் 5ஆம் தேதி இந்த திரைப்படம் உலகம் முழுவதும் திரையரங்குகளில் வெளியாக உள்ளது. இதற்கிடையில், படத்தின் டீசர், டிரெய்லர் மற்றும் பல்வேறு புரோமோஷன் வீடியோக்கள் வெளியாகி ரசிகர்களிடையே படத்தின் மீதான எதிர்பார்ப்பை மேலும் அதிகரித்துள்ளன. குறிப்பாக நகைச்சுவை மற்றும் குடும்ப உணர்வுகள் கலந்த காட்சிகள் ரசிகர்களின் கவனத்தை ஈர்த்துள்ளன.
இந்த சூழலில், ‘பரிமளா & கோ’ திரைப்படத்தை தணிக்கை செய்த மத்திய திரைப்பட தணிக்கை வாரியம், படத்திற்கு ‘யு/ஏ’ சான்றிதழ் வழங்கியுள்ளது. இதன்மூலம் 13 வயதுக்கு மேற்பட்டவர்கள் குடும்பத்துடன் திரையரங்குகளில் இந்த திரைப்படத்தை கண்டு ரசிக்கலாம் என தெரிவிக்கப்பட்டுள்ளது. படத்தின் வெளியீட்டை முன்னிட்டு படக்குழு தீவிரமான விளம்பரப் பணிகளில் ஈடுபட்டு வருகிறது.
—
