ஜீத்து ஜோசப் இயக்கத்தில் மோகன்லால் மற்றும் மீனா நடித்த ‘திரிஷ்யம் 3’ திரைப்படம் கடந்த 2013-ஆம் ஆண்டு வெளியாகி ரசிகர்களிடையே மாபெரும் வரவேற்பை பெற்ற திரைப்படமாக அமைந்தது. வெறும் ரூ.5 கோடி செலவில் தயாரிக்கப்பட்ட இந்த திரைப்படம் உலகளவில் ரூ.75 கோடி வரை வசூல் செய்து மிகப்பெரிய சாதனையை நிகழ்த்தியது. குடும்ப பின்னணி மற்றும் திகில் கலந்த திரைக்கதையால் ரசிகர்களை கவர்ந்த இந்த திரைப்படம் விமர்சகர்களிடமிருந்தும் பாராட்டுகளை பெற்றது. இந்த திரைப்படத்தின் வெற்றியை தொடர்ந்து, தமிழில் கமல்ஹாசன் மற்றும் கவுதமி நடித்த ‘பாபநாசம்’ என்ற பெயரில் மறுஉருவாக்கம் செய்யப்பட்டு வெளியிடப்பட்டது. மேலும், இந்த திரைப்படம் தெலுங்கு, கன்னடம், இந்தி மற்றும் சீன மொழிகளிலும் வெளியாகி பல மொழி ரசிகர்களிடமும் நல்ல வரவேற்பை பெற்றது.
இதனை தொடர்ந்து கடந்த 2021-ஆம் ஆண்டு ‘திரிஷ்யம் 2’ திரைப்படம் வெளியானது. நேரடியாக ஓடிடி தளத்தில் வெளியிடப்பட்ட இந்த திரைப்படம், முதல் பாகத்தை போலவே ரசிகர்களிடையே மிகப்பெரிய வரவேற்பை பெற்றது. விறுவிறுப்பான காட்சிகள் மற்றும் எதிர்பாராத திருப்பங்கள் நிறைந்த இந்த திரைப்படம் ரசிகர்களை இறுதி வரை சுவாரஸ்யமாக ஈர்த்தது. தற்போது இந்த திரைப்படத்தின் மூன்றாவது பாகமான ‘திரிஷ்யம் 3’ உருவாகியுள்ளது. இந்த திரைப்படத்தை ஆசீர்வாத் சினிமாஸ் நிறுவனம் சார்பில் ஆண்டனி பெரும்பாவூர் தயாரித்துள்ளார்.
‘திரிஷ்யம் 3’ திரைப்படம் வருகிற மே 21-ஆம் தேதி திரையரங்குகளில் வெளியாக உள்ளதாக அதிகாரப்பூர்வமாக அறிவிக்கப்பட்டுள்ளது. இதற்கிடையில், இந்த திரைப்படத்தின் டீசர் வெளியாகி ரசிகர்கள் மத்தியில் படத்தின் மீதான எதிர்பார்ப்பை மேலும் அதிகரித்துள்ளது. மேலும், இப்படத்திற்கு தணிக்கை வாரியம் “யு/ஏ” சான்றிதழ் வழங்கியுள்ளது. இதன் மூலம் 13 வயதிற்கு மேற்பட்டோர் இந்த திரைப்படத்தை திரையரங்குகளில் கண்டு ரசிக்கலாம் என தெரிவிக்கப்பட்டுள்ளது. இந்த நிலையில், ரசிகர்கள் நீண்ட நாட்களாக ஆவலுடன் எதிர்பார்த்து காத்திருந்த ‘திரிஷ்யம் 3’ திரைப்படத்தின் டிரெய்லர் தற்போது வெளியாகி சமூக வலைதளங்களில் வேகமாக பரவி வருகிறது.
