பிரபல தொழிலதிபராக அறியப்படும் சரவணன், ‘லெஜண்ட்’ திரைப்படத்தின் மூலம் கதாநாயகனாக தமிழ் சினிமாவில் அறிமுகமானார். அந்தப் படத்திற்கு வந்த விமர்சனங்களை கடந்து, காலப்போக்கில் அவருக்கென தனிப்பட்ட ரசிகர் வட்டம் உருவாகியது. இதனைத் தொடர்ந்து, அவரின் அடுத்த படத்தை ‘எதிர்நீச்சல்’, ‘கொடி’ போன்ற குறிப்பிடத்தக்க திரைப்படங்களை இயக்கிய ஆர்எஸ் துரை செந்தில்குமார் இயக்கி வருகிறார். இந்தப் படத்தில் பாயல் ராஜ்புட், ஆண்ட்ரியா, ஷாம், சந்தோஷ் பிரதாப், லால், விடிவி கணேஷ், ‘பாகுபலி’ புகழ் பிரபாகர் உள்ளிட்ட பல நடிகர்கள் முக்கிய கதாபாத்திரங்களில் நடித்துள்ளனர். இப்படத்திற்கு ஜிப்ரான் இசையமைத்துள்ளார்.
கடந்த பல மாதங்களாக இந்தப் படத்தின் படப்பிடிப்பு தொடர்ந்து நடைபெற்று வந்த நிலையில், தற்போது படம் இறுதிக்கட்டத்தை எட்டியுள்ளது. இந்தச் சூழலில், படத்திற்கு ‘லீடர்’ என்ற தலைப்பை அறிவித்து, அதனுடன் கூடிய அறிமுக வீடியோவையும் படக்குழு வெளியிட்டுள்ளது.
வெளியான அந்த அறிமுக வீடியோவில், தனது மகளை கடத்தி வைத்துள்ள வில்லன் குழுவிடமிருந்து சரவணன் அதிரடி சண்டைக் காட்சிகளின் மூலம் காப்பாற்றும் தருணங்கள் இடம்பெற்றுள்ளன. இதனுடன், இப்படம் வரும் ஏப்ரல் மாதத்தில் திரையரங்குகளில் வெளியாகும் என்றும், தமிழ் மொழியுடன் சேர்த்து தெலுங்கு, மலையாளம், கன்னடம் ஆகிய மொழிகளிலும் படம் வெளியிடப்படும் என்றும் படக்குழு தெரிவித்துள்ளது.
