2023 பொங்கல் விடுமுறைக்கான திரைப்பட வெளியீட்டின் போது “துணிவு” படத்திற்கு அதிகாலை காட்சிக்கான அனுமதி அளிக்கப்பட்டது. அப்போது, காட்சி எதிர்பார்த்த ரசிகர்கள் கூட்டத்தில் இருந்து தவறி விழுந்து ஒரு இளைஞர் உயிரிழந்தார். இதன் காரணமாக, அதன் பின் எந்த படத்திற்கும் தமிழகத்தில் அதிகாலை காட்சி அனுமதி வழங்கப்படவில்லை. இந்த முடிவு ரஜினிகாந்த், கமல்ஹாசன், விஜய் உள்ளிட்ட முன்னணி நடிகர்களின் படங்கள் வெளியான போது கூட தொடர்ந்தது; முதல் காட்சி காலை 9 மணிக்கு மட்டுமே அனுமதிக்கப்பட்டது.
ஆனால் தெலங்கானா, ஆந்திரா, கர்நாடகா, கேரளா ஆகிய மாநிலங்களில் வழக்கம் போல அதிகாலை காட்சிகள், 6 மணி, 8 மணி ஆகிய நேரங்களில் நிகழ்ந்து வருகின்றன. இந்த அனுபவத்தை பெற தமிழக ரசிகர்கள் அண்டை மாநிலங்களில் உள்ள தியேட்டர்களுக்கு சென்று திரைப்படங்களைப் பார்க்கின்றனர்.
இந்த மாதம் நவம்பர் 14 அன்று பான் இந்தியா திரைப்படமாக “கங்குவா” படம் வெளியாக உள்ளது. அதற்காக அதிகாலை காட்சிக்கு தமிழக அரசிடம் தயாரிப்பு நிறுவனம் விண்ணப்பித்துள்ளது. கேரளா, கர்நாடகா, ஆந்திரா, தெலங்கானா ஆகிய மாநிலங்களில் நவம்பர் 14 அன்று அதிகாலை 4 மணிக்கு முதல் காட்சிகள் தொடங்குகின்றன. தமிழகத்திலும் இதற்கான அனுமதியை எதிர்பார்த்துள்ளனர்; அனுமதி கிடைத்தால், அதுகுறித்து புதுப்பிப்பை வழங்குவோம் என தயாரிப்பு நிறுவனம் எக்ஸ் தளத்தில் தெரிவித்துள்ளது.
