நடிகர் சூர்யா, ‘ரெட்ரோ’ படத்தின் வெற்றியைத் தொடர்ந்து தற்போது தனது 45வது திரைப்படத்தில் நடித்து வருகிறார். இந்தப் படத்தை ஆர்.ஜே. பாலாஜி இயக்கி வருகிறார், இதில் நடிகை திரிஷா கதாநாயகியாக நடிக்கிறார். இதற்குப் பிறகு, ‘லக்கி பாஸ்கர்’ படத்தின் இயக்குநர் வெங்கி அட்லூரி இயக்கும் திரைப்படத்தில் சூர்யா தனது 46வது படமாக நடிக்கவுள்ளார். தற்போது இந்தப் படத்திற்கு தற்காலிகமாக ‘சூர்யா 46’ என பெயரிடப்பட்டுள்ளது.
சித்தாரா எண்டர்டெயின்மென்ட் நிறுவனம் இப்படத்தைத் தயாரிக்கிறது. இசையமைப்பாளராக ஜிவி பிரகாஷ் இசையமைக்க உள்ளார். கதாநாயகியாக மமிதா பைஜு நடிக்கிறார். கடந்த மாதம் 19ஆம் தேதி, ‘சூர்யா 46’ படத்தின் பூஜை ஐதராபாத் நகரத்தில் நடைபெற்றது. இந்த நிகழ்வில் படக்குழுவினர் அனைவரும் கலந்துகொண்டனர். இதையடுத்து பழனி முருகன் கோவிலில் சூர்யா சாமி தரிசனம் செய்தார்.
இந்நிலையில், ‘சூர்யா 46’ படத்தின் முதற்கட்ட படப்பிடிப்பு பணிகள் நேற்று ஐதராபாத்தில் துவங்கியுள்ளதாக படக்குழு அறிவித்துள்ளது. மொத்தமாக மூன்று மாதங்களில் படப்பிடிப்பு முடிக்க திட்டமிடப்பட்டுள்ளது. அடுத்த ஆண்டின் கோடை விடுமுறையில் இப்படம் வெளியிடப்படும் என எதிர்பார்க்கப்படுகிறது. இதற்கிடையில், படக்குழு இப்படத்தின் புதிய போஸ்டரை வெளியிட்டுள்ளது. இந்த போஸ்டர் தற்போது இணையத்தில் வேகமாக பரவி வருகிறது.
