ஏவிஎம் புரொடக்ஷன்ஸ் தயாரிப்பில், ஏ. பீம்சிங் இயக்கத்தில், ஜெமினி கணேசன், சாவித்ரி நடித்த களத்தூர் கண்ணம்மா திரைப்படம், இன்றைய ஆகஸ்ட் 12ஆம் நாளில், 65 ஆண்டுகளுக்கு முன்பு 1960ஆம் ஆண்டு வெளிவந்தது. அந்தப் படத்தில் குழந்தை நட்சத்திரமாக அறிமுகமானவர் கமல்ஹாசன். இதன்மூலம் இன்று அவர் திரையுலகில் 66வது ஆண்டில் காலடி எடுத்து வைக்கிறார். அந்தப் படத்தில், 4 வயதான கமல் “தென்னகத்து திரைவானுக்கு ஏவிஎம் அளிக்கும் குழந்தை நட்சத்திரம்” என்கிற டைட்டில் கார்டுடன் அறிமுகமானார். அந்தப் படத்தில் அவர் அளித்த இயல்பான நடிப்பிற்காக சிறந்த குழந்தை நட்சத்திரத்துக்கான தேசிய விருதைப் பெற்றார்.
தமிழில் மட்டுமல்ல, தெலுங்கு, சிங்களம், ஹிந்தி ஆகிய மொழிகளிலும் களத்தூர் கண்ணம்மா ரீமேக் செய்யப்பட்டது. முதலில் குழந்தை நட்சத்திரமாக நடிக்க ஒப்பந்தம் செய்யப்பட்டவர் டெய்சி ராணி என்பவர். ஆனால், படத்தை தயாரித்த ஏவி. மெய்யப்ப செட்டியார் வீட்டுக்கு கமல் சென்றபோது, அவரின் சுட்டித்தனத்தை பார்த்து வியந்த அவர், அந்தப் படத்தில் கமலை நடிக்க வைத்தார்.
குழந்தை நட்சத்திரமாக சில படங்களில் நடித்த அவர், பின்னர் இளம் வயதில் சில படங்களில் சிறிய கதாபாத்திரங்களில் நடித்தார். அதன் பின்னர் கதாநாயகனாக உயர்ந்து, இன்று வரை தொடர்ந்து கதாநாயகனாகவே நடித்து வருகிறார். நடிகராக மட்டுமல்லாமல், தயாரிப்பாளர், இயக்குநர், பாடலாசிரியர், பாடகர் என பல திறமைகளைக் கொண்டவர் கமல்ஹாசன். தமிழில் மட்டுமல்லாமல், மலையாளம், கன்னடம், தெலுங்கு, ஹிந்தி உள்ளிட்ட மொழிகளிலும் தனக்கென ஒரு ரசிகர் வட்டத்தை உருவாக்கியுள்ளார்.
பல புதிய தொழில்நுட்பங்களை இந்திய சினிமாவிற்கு அறிமுகப்படுத்தியவர். அவருடைய ரசிகர்கள் என்று சொல்லும் அளவிற்கு சினிமா உலகில் பலர் உள்ளனர். தற்போது அவர் ராஜ்யசபா எம்.பி. ஆகவும் பதவி வகித்து வருகிறார். அவரது 65 ஆண்டுகால திரையுலகப் பயணத்தை முன்னிட்டு, அவரை குழந்தை நட்சத்திரமாக களத்தூர் கண்ணம்மா படத்தில் அறிமுகப்படுத்திய ஏவிஎம் நிறுவனம், அந்தப் படத்தின் ஒரு வீடியோவை வெளியிட்டு, “65 ஆண்டுகளுக்கு முன்பு களத்தூர் கண்ணம்மா படம் மூலம் வெள்ளித்திரையில் அறிமுகமாகி, மில்லியன் கணக்கானோரின் இதயங்களைத் தொட்டவர். நமக்கு உணர்வுகளையும், இசையையும், மேலும் ஒரு குழந்தை மேதை கமல்ஹாசனையும் அளித்த திரைப்படம் இது. தமிழ்த் திரையுலகில் ஒரு மைல் கல்; என்றென்றும் நினைவில் நிற்கும் படைப்பு,” என வாழ்த்து தெரிவித்துள்ளது.
