நடிப்பு மற்றும் இயக்கம் ஆகிய இரு துறைகளிலும் பிஸியாக செயல்பட்டு வரும் ஆர்.ஜே. பாலாஜி, நடிகர் சூர்யாவின் 45-வது படத்தை இயக்க உள்ளதாக சமீபத்தில் அறிவிக்கப்பட்டது. அதே நேரத்தில், அவர் ‘சொர்கவாசல்’ திரைப்படத்தில் கதாநாயகனாக நடித்துள்ளார்.
இந்த படத்தின் டிரெய்லர் நேற்று வெளியாகி, மக்களிடையே நல்ல வரவேற்பைப் பெற்றது. பா. ரஞ்சித்தின் உதவி இயக்குநராக இருந்த சித்தார்த் விஸ்வநாத் இயக்கியுள்ள இந்த படம், ஜெயிலில் நடைபெறும் கதைக்களத்துடன் உருவாகியுள்ளது. இதில் ஆர்.ஜே. பாலாஜி முற்றிலும் மாறுபட்ட தோற்றத்தில் தோன்றியுள்ளார். மேலும், கருணாஸ், செல்வராகவன், பாலாஜி சக்திவேல் ஆகியோர் முக்கிய கதாபாத்திரங்களில் நடித்துள்ளனர்.
இப்படம் வரும் நவம்பர் 29ஆம் தேதி திரையரங்குகளில் வெளியாக இருக்கிறது. திரைப்படத்தின் ப்ரோமோஷன் பணிகள் தீவிரமாக நடைபெற்று வருகிறது. சமீபத்தில் நடைபெற்ற ஒரு நிகழ்ச்சியில் கலந்துகொண்ட ஆர்.ஜே. பாலாஜி, சில சுவாரஸ்யமான தகவல்களை பகிர்ந்துகொண்டார். அதில் அவர், “ப்ளான் பண்ணி விஜய் டிவியில் ஒரு நிகழ்ச்சி தொகுத்து வழங்கினால், சிவகார்த்திகேயன் மாதிரி வளர்ந்தடையலாம் என்று சிலர் நினைக்கலாம். ஆனால் அது யாராலும் சாத்தியமானது அல்ல. சிவகார்த்திகேயன் தனது திறமையால் விஜய் டிவியில் மிக சிறப்பான வேலை செய்து அனைவராலும் விரும்பப்பட்டார். அதனால் தான் அவர் இன்று இத்தனை உயரத்திற்கு வந்துள்ளார். விஜய் டிவியில் வேலை செய்யும் ஒவ்வொருவரும் சிவகார்த்திகேயனைப் போல் ஆக முடியாது,” என்று கூறினார்.
