இசையமைப்பாளராக இருந்த விஜய் ஆண்டனி கதாநாயகனாக அறிமுகமானார்.அவருடைய முதல் படமான ‘நான்’ படம் அவருக்கு மிகப்பெரிய வெற்றியைத் தந்தது. அதன் பிறகு, ‘சலீம்’, ‘பிச்சைக்காரன்’ போன்ற வெற்றிப்படங்களில் நடித்தார் மற்றும் தனக்கென ஒரு ரசிகர் வட்டத்தை உருவாக்கினார். சில படங்கள் தோல்வியடைந்தாலும், விஜய் ஆண்டனியின் மார்க்கெட் குறையவில்லை. எப்போதும், அவர் கையில் சில படங்கள் இருக்கும்.
சமீபத்தில், அவர் நடித்த ‘ரோமியோ’, ‘மழைபிடிக்காத மனிதன்’, ‘ஹிட்லர்’ ஆகிய படங்கள் எதிர்பார்த்த வெற்றியை பெறவில்லை. இதற்கிடையில், ஜீ தமிழ் தொலைக்காட்சியில் ஒளிபரப்பாகும் ‘மகா நடிகை’ என்ற ரியாலிட்டி நிகழ்ச்சியை தொகுத்து வழங்கி வருகிறார்.
இந்நிலையில், விஜய் ஆண்டனியின் 12-வது படத்தின் அறிவிப்பு நாளை (அக். 16) காலை 11 மணிக்கு வெளியாகவுள்ளது. இதற்கான ஒரு போஸ்டர் தற்போது வெளியிடப்பட்டுள்ளது. அந்த போஸ்டரில் மிகவும் கூர்மையான கண்களுடன் திகிலூட்டும் ஆமை ஒன்று இடம்பெற்றுள்ளது. இந்த படம் எந்தவகையான கதைக்களமாக இருக்கும் என்று ரசிகர்களுக்கு இப்போதே எதிர்பார்ப்பு எகிறியுள்ளது. இந்தப் படத்தை விஜய் ஆண்டனி தயாரிக்க, ‘அட்டக்கத்தி’, ‘இன்று நேற்று நாளை’, ‘காதலும் கடந்துபோகும்’ போன்ற வெற்றிப் படங்களின் எடிட்டரான லியோ ஜான் பால் இயக்குகிறார்.
