ஆக்ஷன் காட்சிகளில் பின்னி பெடல் எடுக்கப்போகும் மாளவிகா… தீவிரமாக நடந்துவரும் சர்தார் 2 படப்பிடிப்பு!

சர்தார் திரைப்படத்தின் வெற்றியைத் தொடர்ந்து, சர்தார் 2 உருவாகி வருகிறது. இந்த படமும் பிரின்ஸ் பிக்சர்ஸ் தயாரிப்பில், பி.எஸ். மித்ரன் மற்றும் கார்த்தி கூட்டணியில் உருவாகி உள்ளது.

இந்த பாகத்திற்கு யுவன் சங்கர் ராஜா இசையமைக்கிறார். படத்தில் எஸ். ஜே. சூர்யா , மாளவிகா மோகனன், ஆஷிகா ரங்கநாத், ரஜிஷா விஜயன் உள்ளிட்ட பலர் முக்கிய கதாபாத்திரங்களில் நடித்துள்ளனர்.

கடந்த மாதம் முதல் சென்னையில் பிரமாண்டமான அரங்கத்தை அமைத்து படப்பிடிப்பு நடந்தது. தற்போது மாளவிகா மோகனன் மற்றும் ஆஷிகா ரங்கநாத் தொடர்பான காட்சிகள் படமாக்கப்பட்டு வருகிறது. தங்கலான் படத்தில் போலவே, சர்தார் 2-ம் மாளவிகாவிற்கு ஆக்ஷன் காட்சிகள் இடம்பெற்றுள்ளன என்றும் அதற்கான படப்பிடிப்பு தீவிரமாக நடந்துவருகிறது என தகவல்கள் வெளியாகியுள்ளன.