இந்திய அணியின் முன்னாள் கேப்டன் எம்.எஸ். தோனி, 2020-ம் ஆண்டு சர்வதேச கிரிக்கெட்டில் இருந்து ஓய்வு பெற்றார். தொடர்ந்து ஐபிஎல் தொடரில் சென்னை சூப்பர் கிங்ஸ் அணிக்காக விளையாடி வந்த அவர், தற்போது ஐபிஎல் கிரிக்கெட்டில் இருந்தும் ஓய்வு பெறுவதாக அறிவித்துள்ளார். அவரது முடிவு ரசிகர்களிடையே சோகத்தை ஏற்படுத்தியுள்ளது.தோனியின் ஓய்வு குறித்து நடிகர் தனுஷ் சமூக வலைதளத்தில் உருக்கமான பதிவைப் பகிர்ந்துள்ளார்.
அதில், “சில விளையாட்டு வீரர்கள் நம்மை மகிழ்விப்பார்கள். இன்னும் சிலர் நம் வாழ்வின் ஒரு அங்கமாகவே மாறிவிடுவார்கள். எம்.எஸ். தோனி இந்த இரண்டிலும் அடங்குபவர். அனைத்து நினைவுகளுக்கும் நன்றி. நீங்கள் இல்லாமல் இந்த விளையாட்டு இனி ஒருபோதும் முன்புபோல் இருக்காது. இருப்பினும், களத்திற்கு வெளியே உங்களைப் பார்க்க ஆவலுடன் காத்திருக்கிறேன்.
உங்களது அறிவுரைகளும் அனுபவமும் ஆயிரக்கணக்கான இளைஞர்களுக்குப் பயனளித்துள்ளன. வரும் தலைமுறையினருக்கும் அவை தொடர்ந்து ஊக்கமளிக்கும் என நம்புகிறேன். பிரியாவிடை சாம்பியனே!” என்று குறிப்பிட்டுள்ளார்.
