கார்த்திக் சுப்பராஜ் இயக்கிய ‘டோரதி’ படத்தின் வெற்றி விழா, அக்டோபர் 7-ம் தேதி சென்னையில் உள்ள கமலா திரையரங்கில் நடைபெற்றது. அப்போது, திருநங்கைகளின் நலனுக்காக நிதியுதவி வழங்கும் முயற்சியைப் படக்குழு முன்னெடுத்தது.
‘எங்கள் சகோதரன்’ அமைப்பின் மூலம் அடையாளம் காணப்பட்ட மருத்துவ மற்றும் நிதியுதவி தேவைப்படும் 25 பேருக்கு இயக்குநர் கார்த்திக் சுப்பராஜ் காசோலைகளை வழங்கினார். அவர்களில் புற்றுநோய், சிறுநீரகச் செயலிழப்பு உள்ளிட்ட தீவிர நோய்களால் பாதிக்கப்பட்டவர்களும், கை, கால்களை இழந்தவர்களும், பிறவியிலேயே பார்வையற்றவர்களும் இடம்பெற்றிருந்தனர்.
உடல்நலப் பாதிப்புகளையும் பொருட்படுத்தாமல், தங்களைக் கவர்ந்த படத்தை உருவாக்கிய இயக்குநரை நேரில் சந்தித்துப் பாராட்ட வேண்டும் என்ற விருப்பத்துடன் அவர்கள் விழாவில் பங்கேற்றனர். இந்த நிதியுதவி அடுத்த ஓராண்டுக்குத் தேவையான மருந்து மற்றும் உணவுச் செலவுகளுக்கு உதவும் எனப் பயனாளிகள் நெகிழ்ச்சியுடன் தெரிவித்தனர். சமூகப் புறக்கணிப்பையும் பல்வேறு சவால்களையும் எதிர்கொண்டு வரும் அவர்களுக்கு இந்த உதவி பெரும் ஆதரவாக இருக்கும் என ‘எங்கள் சகோதரன்’ அமைப்பின் பிரதிநிதிகளான சுதா, ஜெயா ஆகியோர் குறிப்பிட்டனர்.
