உலகப் புகழ்பெற்ற ஹாலிவுட் இயக்குநர் கிறிஸ்டோபர் நோலன் இயக்கத்தில் உருவாகியுள்ள ‘தி ஒடிசி’ (The Odyssey) திரைப்படத்தின் இறுதி டிரெய்லர் வெளியாகி உலகம் முழுவதும் உள்ள ரசிகர்களின் கவனத்தை ஈர்த்துள்ளது. கிரேக்க புராண காவியத்தை அடிப்படையாகக் கொண்டு உருவாக்கப்பட்டுள்ள இந்தப் படம், கிறிஸ்டோபர் நோலனின் திரைப்படப் பயணத்தில் மிகவும் வித்தியாசமான முயற்சியாக பார்க்கப்படுகிறது.
‘தி டார்க் நைட்’ திரைப்படத் தொடர், ‘இன்செப்ஷன்’, ‘இன்டர்ஸ்டெல்லார்’, ‘தி பிரெஸ்டீஜ்’, ‘ஓப்பன்ஹெய்மர்’ உள்ளிட்ட உலகம் முழுவதும் பெரும் வரவேற்பைப் பெற்ற திரைப்படங்களை இயக்கியவர் கிறிஸ்டோபர் நோலன். சிக்கலான திரைக்கதை அமைப்பு, பிரம்மாண்டமான காட்சியமைப்பு, தொழில்நுட்பத் தரம் மற்றும் வித்தியாசமான கதை சொல்லும் பாணி ஆகியவற்றால் அவரது திரைப்படங்கள் தனித்துவமான இடத்தைப் பெற்றுள்ளன.
கடைசியாக வெளியான ‘ஓப்பன்ஹெய்மர்’ திரைப்படம் 7 ஆஸ்கார் விருதுகளை வென்று உலகளவில் சாதனை படைத்தது. மேலும், கணினி கிராபிக்ஸ் பயன்பாட்டை முடிந்தவரை குறைத்து, இயற்கையான காட்சிகளுக்கு முன்னுரிமை அளிப்பதிலும், ஐமேக்ஸ் (IMAX) கேமரா தொழில்நுட்பத்தை அதிக அளவில் பயன்படுத்துவதிலும் கிறிஸ்டோபர் நோலன் தனித்துவமான பெயரை பெற்றுள்ளார்.
கிறிஸ்டோபர் நோலனின் 13-வது திரைப்படமான ‘தி ஒடிசி’, கிரேக்கக் கவிஞர் ஹோமரின் உலகப் புகழ்பெற்ற காவியத்தை மையமாகக் கொண்டு உருவாகியுள்ளது. இதுவரை அறிவியல் புனைவு திரைப்படங்களில் அதிக கவனம் செலுத்திய நோலன், முதல் முறையாக புராணக் கதையை திரைப்படமாக்கியிருப்பது ரசிகர்களின் எதிர்பார்ப்பை மேலும் அதிகரித்துள்ளது.
இந்த திரைப்படத்தில் ஹாலிவுட் நடிகர் மேட் டாமன் மற்றும் ‘ஸ்பைடர் மேன்’ திரைப்படங்கள் மூலம் உலகம் முழுவதும் பிரபலமான டாம் ஹாலண்ட் ஆகியோர் முக்கிய கதாபாத்திரங்களில் நடித்துள்ளனர். முழுக்க முழுக்க ஐமேக்ஸ் கேமராக்களை பயன்படுத்தி உருவாக்கப்பட்டுள்ள இந்த திரைப்படம், வருகிற ஜூலை 17-ஆம் தேதி உலகம் முழுவதும் திரையரங்குகளில் வெளியாக உள்ளது.
இந்நிலையில், ‘தி ஒடிசி’ திரைப்படத்தின் இறுதி டிரெய்லர் தற்போது வெளியாகியுள்ளது. பிரம்மாண்டமான காட்சியமைப்புகள், விறுவிறுப்பான போர்க்கள காட்சிகள் மற்றும் கிறிஸ்டோபர் நோலனின் வழக்கமான திரைக்கதை பாணியை வெளிப்படுத்தும் விதமாக அமைந்துள்ள இந்த டிரெய்லர், இணையத்தில் வேகமாக வைரலாகி ரசிகர்களிடையே மிகுந்த வரவேற்பைப் பெற்று வருகிறது.
