தமிழ் சினிமாவில் முன்னணி நகைச்சுவை நடிகராக ரசிகர்களிடையே பெரும் வரவேற்பை பெற்றவர் சந்தானம். தனது தனித்துவமான நகைச்சுவை பாணி மற்றும் வசனங்களின் மூலம் ரசிகர்களின் மனதில் தனி இடத்தை பிடித்த அவர், பின்னர் கதாநாயகனாகவும் வெற்றிகரமான பயணத்தை தொடங்கினார். ‘கண்ணா லட்டு தின்ன ஆசையா’ திரைப்படத்தின் மூலம் ஹீரோவாக அறிமுகமான சந்தானம், தொடர்ந்து ‘வல்லவனுக்கு புல்லும் ஆயுதம்’, ‘இங்க என்ன சொல்லுது’, ‘இனிமே இப்படித்தான்’, ‘சக்கப்போடு போடு ராஜா’, ‘தில்லுக்கு துட்டு’ உள்ளிட்ட பல திரைப்படங்களில் கதாநாயகனாக நடித்துள்ளார்.
இந்த நிலையில், தற்போது சந்தானம் புதிய திரைப்படம் ஒன்றில் நடிக்க உள்ளதாக தகவல் வெளியாகியுள்ளது. இந்த திரைப்படத்தை அறிமுக இயக்குநரான செல்வின் ராஜ் சேவியர் எழுதி இயக்குகிறார். பிரபல தயாரிப்பு நிறுவனமான ஏஜிஎஸ் என்டர்டெயின்மென்ட் சார்பில் அர்ச்சனா கல்பாத்தி இந்த திரைப்படத்தை தயாரிக்கிறார். புதிய கதைக்களத்தில் உருவாகும் இந்த திரைப்படம் தற்போது ரசிகர்களிடையே கவனத்தை ஈர்த்துள்ளது.
மேலும், இந்த திரைப்படத்தில் நடிகை அபர்னா தாஸ், நடிகர் விடிவி கணேஷ், ஆனந்த்ராஜ் மற்றும் கல்கி ராஜா உள்ளிட்டோர் முக்கிய கதாபாத்திரங்களில் நடிக்க உள்ளனர். ஜாம்பி கதையை மையமாக கொண்டு, திரில்லர் மற்றும் நகைச்சுவை கலந்த பாணியில் இந்த திரைப்படம் உருவாகி வருகிறது. சமீபத்தில் இந்த திரைப்படத்தின் தலைப்பு வெளியிடப்பட்ட நிலையில், அதற்கு ‘லவ் பைட்’ என்று பெயரிடப்பட்டுள்ளது. இந்த டைட்டில் ரசிகர்களிடையே நல்ல கவனத்தை பெற்றுள்ளது.
