எறும்புகள் வாழ கூட இடமில்லாத நிலை வந்துவிட்டது – திரையுலகம் குறித்து இயக்குனர் வசந்தபாலன் எமோஷனல் டாக்!

தமிழ் சினிமாவின் முன்னணி இயக்குநர்களில் ஒருவரான வசந்த பாலன், சமீபத்தில் அளித்த ஒரு பேட்டியில், கோவிட் காலத்திற்குப் பிறகு சிறிய பட்ஜெட் படங்களுக்கு திரையரங்குகள் கிடைப்பது மிகப் பெரிய சவாலாக மாறிவிட்டதாகக் கூறினார். தற்போது பெரும்பாலான திரையரங்குகளில் பெரிய படங்களையே வெளியிடும் போக்கு உருவாகி விட்டதாகவும், அதன் காரணமாக சின்ன படங்களுக்கு தொடர்ந்து இடம் கிடைக்காமல் போவதாகவும் அவர் தெரிவித்தார். முன்பெல்லாம் தீபாவளி அல்லது ஒரு சாதாரண வெள்ளிக்கிழமை என்றாலே நான்கு அல்லது ஆறு படங்கள் ஒரே நேரத்தில் வெளியாகும் சூழல் இருந்தது. ஆனால் இப்போது அந்த நிலை மாறி, இரண்டு படங்கள் அல்லது ஒரு படம் வெளியாகினாலே போதும் என்ற நிலைமைக்கு திரையுலகம் வந்துவிட்டதாக அவர் வருத்தம் தெரிவித்தார். இதன் காரணமாக சிறு படங்களுக்கான தேவை மெதுவாக குறைந்து வருவதாகவும் அவர் கூறினார்.

தனது ‘வெயில்’, ‘அங்காடித்தெரு’, ‘96’, ‘ஆட்டோகிராப்’ போன்ற படங்கள் எல்லாம் விமர்சனங்கள் வெளிவந்த பிறகு இரண்டாவது வாரத்தின் தொடக்கத்தில்தான் மக்களிடையே நல்ல வரவேற்பைப் பெற்று ஓடத் தொடங்கியதாக வசந்த பாலன் நினைவுகூர்ந்தார். ஆனால், இன்றைய சூழலில் ஒரு படத்திற்கு இரண்டாவது வாரம் என்றதே இல்லாத நிலை உருவாகிவிட்டதாகவும், தேவையான அளவிலான திரையரங்குகளே கிடைக்காத சூழல் நிலவுவதாகவும் அவர் கூறினார். சில திரையரங்குகள் கிடைத்தாலும், அதில் தேவையான ஷோக்கள் ஒதுக்கப்படாமல் போவதும் ஒரு பெரிய பிரச்சினையாக இருப்பதாக அவர் குறிப்பிட்டார். எல்லா திரையரங்குகளிலும் ஒரே பெரிய படம் ஓடுவதால், பார்வையாளர்கள் அந்தப் படத்தை மட்டுமே பார்க்க வேண்டும் என்ற கட்டாயம் உருவாக்கப்படுவதாகவும், இதனால் சின்ன படங்களுக்கு வாய்ப்பே இல்லாமல் போவதாகவும் அவர் வேதனை தெரிவித்தார்.

தாங்கள் போன்றவர்கள் சின்ன படங்களின் மூலம் தான் வளர்ந்து வந்தவர்கள் என்றும், லாக்டவுன் காலத்தில் ஓடிடி தளங்கள் சிறு படங்களை வாங்கத் தொடங்கியபோது, அது சின்ன படங்களுக்கு ஒரு பெரிய வாய்ப்பாக இருக்கும் என அனைவரும் மகிழ்ந்ததாகவும் அவர் கூறினார். பெரிய கதைகளை ஓடிடியில் சொல்ல முடியும் என்ற நம்பிக்கை இருந்ததாகவும், ஆனால் காலப்போக்கில் பெரிய தயாரிப்பு நிறுவனங்கள், பெரிய நடிகர்கள் மற்றும் பெரிய இயக்குநர்களே அந்த ஓடிடி தளங்களையும் முழுமையாக தங்கள் வசமாக மாற்றிக் கொண்டுவிட்டதாகவும் அவர் குற்றம்சாட்டினார். தற்போது சிறு படங்களை ஓடிடியில் விற்கவும் கடுமையாக போராட வேண்டிய நிலை இருப்பதாகவும், ஒரு படத்தை அவர்கள் பார்க்கவே ஒரு வருடம் வரை காத்திருக்க வேண்டியதாக இருப்பதாகவும் தெரிவித்தார். தனது ‘அநீதி’ படத்தை ஓடிடி தளம் ஏற்றுக்கொண்டதா இல்லையா என்பதை தெரிந்து கொள்ளவே ஒரு வருடம் ஆனதாகவும் அவர் கூறினார்.

சின்ன படங்களின் மூலம் வந்த இயக்குநர்களும் நடிகர்களும்தான் காலப்போக்கில் பெரிய இயக்குநர்களாகவும், பெரிய நடிகர்களாகவும் மாறுகிறார்கள் என்றும், பெரிய படங்களை மட்டுமே வாங்குவது அவர்களுக்கு அதிக லாபம் தரும் என்றாலும், குறைந்தபட்சம் 75 சதவீதம் பெரிய படங்களும், 25 சதவீதம் சிறு படங்களும் வாங்கினால் கூட எங்களுக்கான ஒரு சிறிய வாய்ப்பு உருவாகும் என்றும் அவர் தெரிவித்தார். ஒரு நிறுவனம் வளர வேண்டும் என்றால் எல்லோரையும் சேர்த்துக் கொண்டு வளர வேண்டும்; ஒருவரை மட்டும் உயர்த்தி மற்றவர்களை ஒதுக்கக் கூடாது என்றும் அவர் வலியுறுத்தினார்.

தற்போது பெரிய படங்களை வாங்கும்போது கூட அதிக வன்முறை உள்ளதா, சண்டைகள் அதிகமாக உள்ளதா, பேய் அல்லது சாமி தொடர்பான கதையா, ரத்தம் தெறிக்கும் காட்சிகள் உள்ளதா என்பதையெல்லாம் பார்த்துத்தான் தேர்வு செய்கிறார்கள் என்றும், இன்றைக்கு வெளியாகும் பல தமிழ் படங்களில் இந்த மாதிரியான வன்முறைகள் அதிகரித்து விட்டதாகவும் அவர் கூறினார். இதனால் சிறுவர்களும் இளைஞர்களும் பெரிதும் பாதிக்கப்படுகிற சூழல் உருவாகியுள்ளதாகவும் அவர் கவலை தெரிவித்தார். தமிழ்நாட்டில் மொத்தமாகவே சுமார் 1450 திரையரங்குகள்தான் இருப்பதாகவும், ஒரு பெரிய நடிகரின் படம் வந்தால் அதில் 900 திரையரங்குகளில் அந்தப் படத்தை வெளியிட்டு விடுவதாகவும், சின்ன படங்களுக்கு மூச்சு விட கூட இடமில்லை என்றும் அவர் தெரிவித்தார்.

தங்கள் படங்களை திரையரங்குகளிடம் காட்டும்போது, “இதெல்லாம் ஓடாது, திரையரங்குகள் கிடைக்காது, ஷோக்கள் கேன்சல் ஆகிவிடும்” என்று எந்த கருணையும் இல்லாமல் சொல்லிவிடுகிறார்கள் என்றும், நல்ல சினிமாவே தமிழ் சினிமாவின் உண்மையான ஆரோக்கியம் என்பதை அவர்கள் மறந்து விடுகிறார்கள் என்றும் வசந்த பாலன் குற்றம் சாட்டினார். சமீபத்தில் ஒரு ஓடிடி நிறுவனம் தாங்கள் வாங்கிய படங்களின் பட்டியலை வெளியிட்டதாகவும், அதில் எல்லாமே பெரிய படங்களாகவோ அல்லது பெரிய தயாரிப்பு நிறுவனங்களின் படங்களாகவோ இருப்பதாகவும் அவர் குறிப்பிட்டார். இங்கே யானைகளுக்கு மட்டுமே இடம் இருக்கும், எறும்புகளுக்கு இடமில்லை என்ற நிலை உருவாகிவிட்டதாகவும், நல்ல இயக்குநர்கள் எடுத்த சிறு படங்களுக்கே இப்படி ஒரு அலட்சிய மனநிலை உருவாகி வருவது வேதனையளிப்பதாகவும் அவர் கூறினார்.

இந்த சூழலில், குறைந்தபட்சம் 25 சதவீத இடமாவது சின்ன படங்களுக்கு வழங்க வேண்டும் என்ற கோரிக்கையை தான் வைக்கிறேன் என்றும், இவ்வளவு கடினமான காலகட்டத்தில் படம் எடுப்பதே ஒரு பெரிய சவாலாக மாறிவிட்டதாகவும் அவர் தெரிவித்தார். தன்னுடைய படத்தை எடுத்துவிட்டு ஒன்றரை வருடம் வரை வெளியிட முடியாமல் வைத்திருந்ததாகவும், பெரிய நிறுவனம், பெரிய படம், பெரிய ஹீரோ அல்லாதவர்களை ‘கெட் அவுட்’ என்று சொல்லிவிடும் மனநிலை உருவாகி வருவதாகவும் அவர் வருத்தத்துடன் கூறினார். டிக்கெட் விலையும் குறையாமல் இருப்பதால், இளைஞர்கள் வன்முறை நிறைந்த படங்களை கையில் பட்டாக்கத்தியைப் பிடித்தபடி ரிலீஸ் செய்வது போன்ற சூழல் உருவாகியுள்ளதாகவும், ஒரு சமூகப் பொறுப்புள்ள இயக்குநராக இவை அனைத்தும் தன்னை மிகவும் வேதனைக்கு உள்ளாக்குவதாக வருத்தத்துடன் கூறியுள்ளார்.