விஜய் நடிப்பில் அட்லி இயக்கிய ‘தெறி’ திரைப்படம் 2016-ல் வெளிவந்து மிகப்பெரிய வெற்றியைப் பெற்றது. இந்தப் படத்தின் இந்தி ரீமேக் தற்போது உருவாகி வருகிறது.
இந்த படத்தை, அட்லியின் உதவி இயக்குனர்களில் ஒருவரான காலிஸ் இயக்கி வருகிறார். இதில் விஜய் நடித்த கதாபாத்திரத்தில் பிரபல பாலிவுட் நடிகர் வருண் தவான் நடிக்கிறார். படத்தின் நாயகிகளாக கீர்த்தி சுரேஷ் மற்றும் வாமிகா கபி நடிக்கின்றனர். ஒளிப்பதிவில் மைக்கேல் படத்தின் ஒளிப்பதிவாளர் கிரண் கவுஷிக் பணியாற்றுகிறார்.
அட்லி மற்றும் அவரது மனைவி பிரியாவின் ஏ பார் ஆப்பிள் ஸ்டுடியோஸ், ஜியோ ஸ்டுடியோஸ் மற்றும் முராத் கெதானியின் சினி-1 ஸ்டுடியோஸ் ஆகியன இணைந்து இந்தப் படத்தை தயாரித்துள்ளன. “பேபி ஜான்” என பெயரிடப்பட்டுள்ள இப்படம், கிறிஸ்துமஸ் விடுமுறையை முன்னிட்டு டிசம்பர் 25-ஆம் தேதி வெளியிடப்படும் என அறிவிக்கப்பட்டுள்ளது. இந்நிலையில், படத்தின் தயாரிப்பு குழு வீடியோ ஒன்றை வெளியிட்டு, இன்று இப்படத்தின் டீசர் திரையரங்குகளில் வெளியாகும் என அறிவித்துள்ளது.
