’96’ படத்தின் மூலம் பிரிந்த காதலர்களின் உணர்வுகளை வெளிப்படுத்திய இயக்குனர் பிரேம் குமார், ‘மெய்யழகன்’ படத்தில் பிரிந்து போன உறவுகளின் உணர்வுகளை திரைக்கு முன் அமரும் பார்வையாளர்களுக்கு உணர்த்தியுள்ளார்.
பலருக்கும், சில காரணங்களினால் அவர்கள் பிறந்து வளர்ந்த ஊரை விட்டு வேறு இடத்திற்கு மாற வேண்டிய சூழ்நிலை ஏற்படும். எவ்வளவு ஆண்டுகள் கடந்தாலும், அந்த ஊர், வீடு, அங்கு பழகிய உறவினர்கள், நண்பர்கள் போன்றவை நமக்குள் அழியாத நினைவுகளாகவே இருக்கின்றன. அப்படிப்பட்ட ஒரு இடத்திற்கு நாம் மீண்டும் செல்ல வேண்டிய சமயம் வந்தால், அந்த அனுபவம் எப்படி இருக்கும் என்பதையே ‘மெய்யழகன்’ படம் எடுத்துக்காட்டுகிறது.
1996ல் குடும்பத் தகராறினால் இளைஞனாக இருக்கும் அரவிந்த்சாமியின் குடும்பம் தஞ்சாவூரை விட்டு சென்னைக்கு குடிபெயர்கிறது. 22 ஆண்டுகளுக்குப் பிறகு 2018ல், அரவிந்த்சாமி, தனது சித்தப்பா மகளின் திருமணத்திற்காக, தஞ்சாவூர் அருகிலுள்ள நீடாமங்கலம் ஊருக்குப் செல்லும். அவரைப் பார்த்தவுடன் உறவினரான கார்த்தி, ‘அத்தான், அத்தான்’ என அன்புடன் விழுந்து விழுந்து கவனிக்கிறார். அந்த அன்பு, ஆரம்பத்தில் சிக்கலாக இருந்தாலும், கார்த்தியின் பாசத்தில் போகப்போக அரவிந்த்சாமி ஈர்க்கப்படுகிறார். மனிதன் எப்படி இருக்க வேண்டும் என்பதை கார்த்தியின் பேச்சு அவருக்கு உணர்த்துகிறது. தன்னையே அடையாளம் காட்டிய கார்த்தி மீது அரவிந்த்சாமிக்கு மரியாதையும் உருவாகிறது. இவர்கள் இருவரின் பாசப்பிணைப்பு எப்படி சென்றடைகிறது என்பதே கதையின் மீதி.
கார்த்தி ‘அத்தான்’ என்பதையே ‘த்தான்’ என்று அழைப்பது போல, இன்றும் பல ஊர்களில் இத்தகைய அன்பான மனிதர்களைப் பார்க்க முடியும். ஊரை விட்டு சென்றவர்களும் திரும்பி வந்தாலும், ஊருக்குள்ளேயே இருப்பவர்களுக்காகவும், எந்த பிரதிபலனும் எதிர்பார்க்காமல் உதவிக்கரம் நீட்டுவர். நன்மையோ, தீமையோ அவர்கள் முதலில் உதவ விரைவார்கள். இப்படிப்பட்ட மனிதர்களால் தான், பல ஊர்களில் பலரது உறவுகள் தொடர்ந்து நீடிக்கின்றன.
படம் முழுவதும் கார்த்தியும், அரவிந்த்சாமியும் ஆக்கிரமித்திருந்தாலும், இருக்கும் ஓரிரு காட்சிகளில் ராஜ்கிரண், ஸ்ரீதிவ்யா, ஜெயப்பிரகாஷ் அவ்வளவு அழகாய் நடித்திருக்கிறார்கள். அரவிந்த்சாமியின் முன்னாள் காதலி ‘மச்சான்’ என அழைத்து அவரது தோளை தொட்டுச் செல்வதும், அரவிந்த்சாமியின் தங்கை அண்ணனைப் பார்த்து கலங்கித் தவிப்பதும், அந்த ஓரிரு நிமிடங்களியே அந்தக் கதாபாத்திரங்களில் நடித்தவர்கள் நம்மை என்னவோ செய்கிறார்கள்.
படத்தின் தலைப்பு ‘மெய்யழகன்’ என்றாலும், அந்தப் பெயரின் அர்த்தத்தை அரவிந்த்சாமி எப்போது உணருவார் என்ற திகில்தான் படத்தின் மொத்த திரைக்கதை. படத்தின் எந்த தருணத்தில் கார்த்தி தனது கதாபாத்திரத்தில் முழுமையாக இணைந்தார் என்று சொல்ல முடியாது; தொடக்கம் முதல் இறுதி வரை அவர் அந்தக் கதாபாத்திரமாகவே மாற்றம் அடைந்துள்ளார். ‘பருத்தி வீரன்’, ‘கடைக்குட்டி சிங்கம்’ படங்களுக்குப் பிறகு, கார்த்திக்குப் பெயர் வாங்கித் தரும் ஒரு முக்கியமான படம் ‘மெய்யழகன்’ எனச் சொல்லலாம்.
