நடிகர் விஜய் நடிப்பில், இசையமைப்பாளர் யுவன் சங்கர் ராஜா இசையில், வெங்கட் பிரபு இயக்கத்தில் கடந்த வாரம் வெளியான படம் ‘தி கோட்’. இப்படம் தமிழ்நாட்டில் மக்களிடையே பெரும் வரவேற்பைப் பெற்றுள்ளது. கடந்த நான்கு நாட்களாக பல திரையரங்குகளில் ஹவுஸ்புல் காட்சிகளாகவே இப்படம் ஓடிவருவதாக திரையரங்க வட்டாரங்கள் தெரிவிக்கின்றன.
திரையரங்குகளில் ‘தி கோட்’ படம் 3 மணி நேரம் 3 நிமிடங்கள் ஓடக்கூடியதாக இருந்தது. இந்த படத்தை இயக்குனர் வெங்கட் பிரபு எடிட் செய்து முடித்த போது, படத்தின் நீளம் 3 மணி நேரம் 40 நிமிடங்களாக இருந்ததாம். அதன் பிறகு, 37 நிமிடக் காட்சிகளை குறைத்துத்தான் படத்தை திரையரங்குகளில் வெளியிட்டுள்ளனர்.
எனினும், இந்த படத்தை ஓடிடி தளத்தில் வெளியிடும் போது, குறைக்கப்பட்ட 37 நிமிடக் காட்சிகளையும் சேர்த்து, மொத்தம் 3 மணி நேரம் 40 நிமிடங்களாக வெளியிட திட்டமிட்டுள்ளார்களாம். இந்த தகவலை வெங்கட் பிரபு எக்ஸ் தளத்தில் ‘ஸ்பேஸ்’ பேச்சின் போது கூறியுள்ளார். இப்படிப்பட்ட வெளியீடு பற்றிய முடிவை தயாரிப்பாளர் கூறியதாகவும், ஓடிடியில் வெளியாகும் சில நாட்களுக்கு முன்பு இதுகுறித்து ஒரு அதிகாரப்பூர்வ அறிவிப்பு வரும் என்று எதிர்பார்க்கப்படுகிறது.
