வெங்கட் பிரபு இயக்கத்தில், யுவன் ஷங்கர் ராஜா இசையமைத்துள்ள, விஜய் நடிக்கும் ‘தி கோட்’ படம் செப்டம்பர் 5 ஆம் தேதி வெளியாக உள்ளது. இந்த படத்துக்காக தனி இசை வெளியீட்டு விழா எதுவும் நடத்தப்படவில்லை. அரசியல் கட்சி தொடங்கியதால் விஜய் இதைத் தவிர்த்தாரா அல்லது வேறு அரசியல் காரணங்கள் உண்டா என்பது தெரியவில்லை. அவர் நேரடியாக தனது கட்சி மாநாட்டில் பேசுவோம் என்று விட்டுவிட்டாரா எனும் கேள்வியும் எழுகிறது.
இந்த படத்திற்காக இதுவரை நான்கு சிங்கிள் பாடல்கள் வெளியிடப்பட்டுள்ளன: “விசில் போடு, சின்னச் சின்ன கண்கள், ஸ்பார்க், மட்ட” ஆகியவை. மேலும், ஐந்தாவது பாடலாக இளையராஜாவின் பாடலை ரீமிக்ஸ் செய்து இணைத்துள்ளோம் என்று இயக்குனர் வெங்கட் பிரபு கூறியுள்ளார். அந்த பாடல் படத்தில் பொருத்தமான இடத்தில் இடம் பெறும் எனவும் அவர் தெரிவித்துள்ளார்.
முன்னதாக, தனது அப்பா இளையராஜாவின் சில ஹிட் பாடல்களை யுவன் தனது படங்களில் ரீமிக்ஸ் செய்துள்ளார். ‘குறும்பு’ படத்தில் ‘ஆசை நூறு வகை’, ‘வல்லவன்’ படத்தில் ‘காதல் வந்துருச்சி’, ‘சிலம்பாட்டம்’ படத்தில் ‘வச்சிக்கவா உன்ன மட்டும் நெஞ்சுக்குள்ள’, ‘டிக்கிலோனா’ படத்தில் ‘பேரு வச்சாலும் வைக்காம’, ‘காபி வித் காதல்’ படத்தில் ‘ரம் பம் பம், ஆரம்பம்’ ஆகியவற்றை அவர் ரீமிக்ஸ் செய்துள்ளார்.தமிழ் சினிமாவில் ரீமிக்ஸ் கலாச்சாரத்தை முதன்முதலில் அறிமுகப்படுத்தியவரே யுவன். 2003-ல் வெளியான ‘குறும்பு’ படத்தில் இதைத் தொடங்கியவர். அஜித் நடித்த ‘பில்லா, ஆரம்பம்’ போன்ற படங்களை இயக்கிய விஷ்ணுவர்தன், இதன் மூலம் இயக்குனராக அறிமுகமானார்.
