தமிழ் திரைப்படமான ‘ராஜா ராணி’ மூலம் இயக்குநராக அறிமுகமானவர் அட்லி. அவர் கடைசியாக இயக்கிய ‘ஜவான்’ திரைப்படம் உலக அளவில் ரூ.1,100 கோடியை தாண்டி மிகப்பெரிய சாதனையை ஏற்படுத்தியது.இந்த நிலையில், அட்லி இயக்கும் அடுத்த படத்தில் தெலுங்கு நடிகர் அல்லு அர்ஜூன் நடிக்க உள்ளார். மேலும், இந்தப் படத்தில் அல்லு அர்ஜூன் இரட்டை வேடங்களில் நடிக்கிறார் என்ற தகவலும் வெளியாகியுள்ளது. இதற்கு முன்னர் அட்லி இயக்கிய மெர்சல், பிகில் மற்றும் ஜவான் போன்ற படங்களில் கதாநாயகர்கள் இரு வேடங்களில் நடித்துள்ளனர். இதன் தொடர்ச்சியாக இந்தப் படமும் அந்த ஒரே மாதிரியான அணுகுமுறையுடன் உருவாக இருக்கிறது.
இந்த படம் மிகப் பெரிய அளவிலான யூனிவர்ஸ் ஆக்ஷன் மற்றும் பொழுதுபோக்கு கதைக்களத்தில் உருவாக இருப்பதாக கூறப்படுகிறது. தற்போது இப்படத்தின் ப்ரோமோ ஷூட்டிங் முடிந்துவிட்டது என்றும், ஏப்ரல் 8 ஆம் தேதி அல்லு அர்ஜூன் பிறந்தநாளில் அந்த ப்ரோமோவை படக்குழு வெளியிடவுள்ளதாகவும் தெரிவிக்கப்பட்டுள்ளது. இந்தப் படத்தை சன் பிக்சர்ஸ் நிறுவனம் மிகப்பெரிய முயற்சியாக தயாரிக்கிறது.
இதற்கிடையில், சன் பிக்சர்ஸ் ‘தி மேக்னம் ஓபஸ்’ எனும் தலைப்பில் ஒரு போஸ்டரை வெளியிட்டு, விரைவில் அப்டேட் வரும் என அறிவித்துள்ளது. நாளை அந்த அப்டேட் வெளிவரும் என எதிர்பார்க்கப்படுகிறது. சமீபத்தில் ஒரு நேர்காணலில் இயக்குநர் அட்லி, “இந்தப் படத்தில் மக்கள் நிச்சயமாக ஆச்சரியப்படுவார்கள். இது இந்தியாவை பெருமைபடுத்தும் விதமாக ஒரு பிரம்மாண்டமான திரைப்படமாக இருக்கும்” எனக் கூறியுள்ளார். இந்தப் படத்தின் படப்பிடிப்பு ஆகஸ்ட் அல்லது செப்டம்பர் மாதங்களில் தொடங்கும் என கணிக்கப்படுகிறது.
