ஏ.ஆர்.முருகதாஸ் இயக்கும் புதிய படத்தில் பாலிவுட் நடிகர் சல்மான்கான் கதாநாயகனாக நடிக்கிறார். இதில் சல்மான்கானுக்கு ஜோடியாக ராஷ்மிகா மந்தனா நடிக்க உள்ளார். இந்தப் படத்திற்கு ‘சிக்கந்தர்’ என்று பெயர் வைக்கப்பட்டுள்ளது. இது ஒரு “புராணக் கதை” மையமாக உருவாகும் படமாகும். படத்தை பிரபல தயாரிப்பாளர் சஜித் நதியத்வாலா தயாரிக்கிறார்.
சல்மான்கான், 10 ஆண்டுகள் கழித்து, தயாரிப்பாளர் சஜித் நதியத்வாலாவுடன் மீண்டும் இணைந்திருப்பது குறிப்பிடத்தக்கது. மேலும், இந்தப் படத்தில் காஜல் அகர்வால், சுனில் ஷெட்டி, சத்யராஜ் உள்ளிட்டோர் முக்கிய கதாபாத்திரங்களில் நடிக்கின்றனர். சல்மான்கான், இந்த படம் அடுத்த ஆண்டு ரம்ஜான் பண்டிகைக்கு வெளியாகும் என்று தனது எக்ஸ் பக்கத்தில் அறிவித்தார்.
படத்தின் படப்பிடிப்பு தற்போது மும்பையில் நடைபெற்று வருகிறது. இந்நிலையில், ‘சிக்கந்தர்’ படத்தின் டீசர் குறித்த தகவல் வெளியாகியுள்ளது. டீசரை சல்மான்கானின் பிறந்த நாளான இன்று வெளியிட திட்டமிடப்பட்டிருந்தது. ஆனால், முன்னாள் பிரதமர் மன்மோகன் சிங் மறைவின் காரணமாக டீசர் வெளியீடு ஒத்திவைக்கப்பட்டுள்ளது.இதை தயாரிப்பு நிறுவனம் அதிகாரப்பூர்வமாக அறிவித்துள்ளது. மேலும், இந்த டீசர் நாளை காலை 11.07 மணிக்கு வெளியிடப்படும் என தெரிவிக்கப்பட்டுள்ளது.
