தமிழ் திரையுலகின் முன்னணி நடிகர்களில் ஒருவராக திகழ்கிறார் கார்த்தி. சமீபத்தில் அவர் நடித்த மெய்யழகன் திரைப்படம் வெளியானது. படம் நல்ல வரவேற்பைப் பெற்றது. அதைத் தொடர்ந்து, இயக்குநர் நலன் குமாரசாமி இயக்கத்தில் கார்த்தியின் 26வது திரைப்படமான வா வாத்தியார் படத்தின் படப்பிடிப்பு நிறைவடைந்துள்ளது.
நலன் குமாரசாமி இதற்கு முன்பு சூது கவ்வும், காதலும் கடந்து போகும் போன்ற படங்களை இயக்கியவர். வா வாத்தியார் திரைப்படத்தில் கார்த்தி, எம்.ஜி.ஆர் ரசிகனாக நடித்துள்ளார். இப்படத்தில் கதாநாயகியாக கீர்த்தி ஷெட்டி நடித்துள்ளார். மேலும் சத்யராஜ், ராஜ் கிரண் உள்ளிட்டோர் முக்கிய கதாபாத்திரங்களில் நடித்துள்ளனர். ஸ்டூடியோ கிரீன் நிறுவனம் தயாரித்துள்ள இப்படத்திற்கு இசையமைப்பை சந்தோஷ் நாராயணன் மேற்கொண்டுள்ளார்.
இந்தப்படத்தின் ஃபர்ஸ்ட் லுக், டீசர் மற்றும் பாடல்கள் ஒன்றன்பின் ஒன்றாக வெளியாகி ரசிகர்களிடையே பெரும் எதிர்பார்ப்பை ஏற்படுத்தின. ரசிகர்கள் இப்படத்தின் வெளியீட்டிற்காக ஆவலுடன் காத்திருந்த நிலையில், படக்குழு அதிகாரப்பூர்வமாக வெளியீட்டு தேதியை அறிவித்துள்ளது. அதன்படி, வா வாத்தியார் திரைப்படம் வருகிற டிசம்பர் 5ஆம் தேதி திரையரங்குகளில் வெளியாகும் என அறிவிக்கப்பட்டுள்ளது.
