நடிகர் சூர்யாவின் 44-வது படமாக உருவாகியுள்ள ‘ரெட்ரோ’ திரைப்படத்தை இயக்குனர் கார்த்திக் சுப்பராஜ் இயக்கியுள்ளார். இந்த படத்தை சூர்யாவின் 2டி எண்டர்டெயின்மென்ட் மற்றும் கார்த்திக் சுப்பராஜின் ஸ்டோன் பென்ச் நிறுவனம் இணைந்து தயாரித்துள்ளன. இப்படத்திற்கு இசையமைப்பாளர் சந்தோஷ் நாராயணன் இசையமைத்துள்ளார்.
பூஜா ஹெக்டே இப்படத்தில் நாயகியாக நடித்துள்ள நிலையில், ஜெயராம், கருணாகரன், ஜோஜு ஜார்ஜ் மற்றும் சுஜித் ஷங்கர் ஆகியோர் முக்கிய கதாபாத்திரங்களில் நடித்துள்ளனர். தொழிலாளர் தினமான மே 1-ஆம் தேதி இப்படம் திரையரங்குகளில் வெளியாகும் என அறிவிக்கப்பட்டுள்ளது. ஏற்கனவே இந்த படத்தின் டீசரும், முதல் பாடலும் வெளியாகி ரசிகர்களிடையே நல்ல வரவேற்பை பெற்றன. அந்த வரவேற்பைத் தொடர்ந்து, இப்படத்தின் சில படப்பிடிப்பு காட்சிகள் காமிக்ஸ் வடிவில் வெளியிடப்பட்டு, சமூக ஊடகங்களில் வைரலாகி வருகின்றன.
சமீபத்தில் வெளியான இப்படத்தின் முதல் பாடலான ‘கண்ணாடி பூவே’ பாடல் ரசிகர்களிடமிருந்து சிறந்த வரவேற்பை பெற்றது. தற்போது, ‘ரெட்ரோ’ திரைப்படத்தின் ‘கனிமா’ என்ற புதிய பாடலை படக்குழு வெளியிட்டுள்ளது. இந்த பாடலுக்கான வரிகளை கவிஞர் விவேக் எழுதியுள்ளார். மேலும், இந்த பாடலை இசையமைப்பாளர் சந்தோஷ் நாராயணன் தான் பாடியிருக்கிறார் என்பது குறிப்பிடத்தக்கது.
