ஓஎம்ஜி புரொடக்ஷன்ஸ் சார்பில் தயாரிக்கப்படும் படம் ‘பனி’. இந்தப் படத்தை விஎன் ஆதித்யா இயக்குகிறார். இதில் கேத்ரின் தெரசா முக்கிய கதாபாத்திரத்தில் நடிக்கிறார். அவருடன் மகேஷ் ஸ்ரீராம் முக்கிய வேடத்தில் நடித்துள்ளார்.
‘மெட்ராஸ்’ திரைப்படத்தின் மூலம் தமிழ்த் திரையுலகில் அறிமுகமான கேத்ரின் தெரசா அதன் பின்பு கதகளி, கணிதன், கடம்பன், கதாநாயகன், கலகலப்பு 2 ஆகிய ‘க’ எழுத்தால் தொடங்கும் படங்களில் தொடர்ந்து நடித்தார். அதன்பிறகு அவருக்கு வாய்ப்புகள் குறைவாகி விட்டன. கடைசியாக 2019ஆம் ஆண்டு வெளியாகிய ‘அருவம்’ படத்தில் நடித்திருந்தார். அதன் பிறகு 5 ஆண்டுகளுக்கு பிறகு தற்போது ‘பனி’ திரைப்படத்தில் நடித்து முடித்துள்ளார். இந்த படத்தில் அவர் சோலோ ஹீரோயினாக நடித்துள்ளார். இந்த படம் அடுத்த மாதம் திரைக்கு வர உள்ளது.
இந்த படத்தைப் பற்றிக் கூறும் போது இயக்குநர் விஎன் ஆதித்யா கூறியதாவது: இந்த உலகம் அனைத்து உயிர்களுக்குமானது. ஆனால் மனிதன், இந்த உலகம் தனக்கே என்று எண்ணி, மற்ற உயிரினங்களை பன்னெடுங்காலமாக மெதுவாக அழித்து வந்திருக்கிறான். அதன் விளைவாக மனித உயிர்கள் உலகம் முழுவதும் பரவிக் கிடக்கின்றன. இந்த படம், மனித உயிர்கள் எவ்வளவு முக்கியமோ அதேபோல் மற்ற உயிரினங்களின் வாழ்வும் அவ்வளவு முக்கியம் என்பதைக் கூறும் வகையில் உருவாகியுள்ளது. இது ஒரு சஸ்பென்ஸ் திரில்லர் திரைப்படமாக இருக்கும்.
இந்த படத்திற்குப் பொருத்தமான கதாநாயகி கேத்ரின் தெரசா என்பது படம் வெளியானதும் அனைவரும் உணர்வார்கள். அவர் நடிப்புத் திறமை இப்படத்திற்கு மிகப்பெரிய பலமாக அமைந்துள்ளது. இந்தி, தெலுங்கு, தமிழ், கன்னடம், மலையாளம் மற்றும் பல மொழிகளில் இப்படம் வெளியிடப்பட உள்ளது என இயக்குநர் தெரிவித்தார்.இதனிடையே, சுந்தர் சி இயக்கி நடித்திருக்கும் ‘கேங்கர்ஸ்’ படத்திலும் கேத்ரின் தெரசா முக்கிய வேடத்தில் நடித்துள்ளார். அந்த படம் வருகிற 25ம் தேதி வெளியாகிறது. இந்த இரண்டு படங்களும் தனக்கு நல்ல ரீ என்ட்ரியாக இருக்கும் எனும் நம்பிக்கையில் உள்ளார் கேத்ரின் தெரசா.
