நிஜ வாழ்க்கையில் சாதனை படைத்தவர்களின் வாழ்க்கை வரலாற்றை அடிப்படையாகக் கொண்டு திரைப்படங்கள் அவ்வப்போது உருவாகி வருகின்றன. அந்த வரிசையில், முன்னாள் இஸ்ரோ விஞ்ஞானி நம்பி நாராயணனின் வாழ்க்கை வரலாற்றை மையமாகக் கொண்டு மாதவன் இயக்கி, நடித்த ‘ராக்கெட்ரி: தி நம்பி எபெக்ட்’ திரைப்படம் உருவானது. கடந்த 2022ஆம் ஆண்டு வெளியான இந்த திரைப்படம் நல்ல வரவேற்பைப் பெற்றதுடன், வர்கீஸ் மூலன் பிக்சர்ஸ் மற்றும் ட்ரைகலர் பிலிம்ஸ் ஆகிய நிறுவனங்கள் தயாரித்த இந்த படம் தேசிய விருது பெறும் பெருமையும் பெற்றது.
இந்நிலையில், மாதவன் தனது அடுத்த வாழ்க்கை வரலாற்று படமாக மறைந்த விஞ்ஞானி ஜி.டி.நாயுடுவின் வாழ்க்கையை மையமாகக் கொண்டு ஒரு புதிய படத்தில் நடிக்க உள்ளார். ஜி.டி.நாயுடு, எந்திரவியல் மற்றும் விவசாயம் தொடர்பாக எண்ணற்ற ஆராய்ச்சிகளை மேற்கொண்டவர். இந்த புதிய படத்தை ‘ராக்கெட்ரி’ படத்தையே தயாரித்த அதே தயாரிப்பு நிறுவனங்கள் இணைந்து தயாரிக்கின்றன. இப்படத்திற்கான படப்பிடிப்பு ஜி.டி.நாயுடுவின் பிறந்த இடமான கோயம்புத்தூரில் தொடங்கியுள்ளது.
இந்த நிலையில், படத்தின் தலைப்பு போஸ்டர் தற்போது வெளியாகியுள்ளது. இப்படத்திற்கு ‘ஜி.டி.என்’ என பெயரிடப்பட்டுள்ளது. மேலும், யோகி பாபு, ஜெயராம், பிரியாமணி ஆகிய முன்னணி நடிகர்கள் இதில் முக்கியமான கதாபாத்திரங்களில் நடிக்க உள்ளதாக தகவல் வெளியிடப்பட்டுள்ளது.
