பிரபல இயக்குனர் ஏ.ஆர். முருகதாஸ் இயக்கத்தில், நடிகர் சிவகார்த்திகேயன் தனது 23-வது திரைப்படமான ‘மதராஸி’யை நடித்து முடித்துள்ளார். இந்த படத்தில் சிவகார்த்திகேயனுடன் இணைந்து ருக்மினி வசந்த், விக்ராந்த், வித்யூத் ஜம்வால், பிஜு மேனன், டான்சிங் ரோஸ் சபீர் ஆகியோரும் முக்கிய கதாபாத்திரங்களில் நடித்துள்ளனர். இந்த திரைப்படத்தினை ஸ்ரீ லட்சுமி மூவிஸ் நிறுவனம் தயாரித்துள்ளது. இசையமைப்பாளராக அனிருத் பணியாற்றியுள்ளார்.
இத்திரைப்படம் அடுத்த ஆண்டு பொங்கல் திருவிழாவை முன்னிட்டு வெளியாகும் என தகவல்கள் வெளியாகியுள்ளன. இந்நிலையில், ‘மதராஸி’ படத்தின் கதையை துவக்கத்தில் வேறு ஒரு நடிகரிடம் சொல்லியிருந்ததாக இயக்குனர் ஏ.ஆர். முருகதாஸ் சமீபத்தில் நடைபெற்ற பேட்டி ஒன்றில் தெரிவித்துள்ளார்.
அவர் கூறியதாவது: “மூன்றாண்டுகளுக்கு முன்னர் ‘மதராஸி’ படத்தின் கதையை பாலிவுட் நடிகர் ஷாருக்கானிடம் சொன்னேன். எனினும், அவர் முன்பே கேட்டிருந்தபடி முழுக் கதையினை சொல்லவில்லை. அவர் படத்தின் பாதிக் கதையை கேட்டதும், அதில் நடிக்கத் தயார் என்று ஒப்புக்கொண்டார். ஆனால், ஒரு மாதத்துக்குப் பிறகு மீண்டும் அதைப் பற்றி அவரிடம் பேசியபோது எந்த பதிலும் பெறவில்லை. அதன்பிறகு அந்தக் கதையை முழுமையாக விரிவாக்கி, சிவகார்த்திகேயனிடம் சொன்னேன். அவர் அந்த கதையில் நடிக்க உடனே ஒப்புக் கொண்டார். மேலும், ‘மதராஸி’ படத்தில் அவருடன் பணியாற்றிய அனுபவம் எனக்கு மிகவும் சிறப்பாக இருந்தது” என்று தெரிவித்தார்.
