லோகேஷ் கனகராஜ் இயக்கத்தில் ரஜினிகாந்த் நடிக்கும் திரைப்படம் ‘கூலி’. இப்படத்தில் நாகார்ஜூனா, ஸ்ருதிஹாசன், சத்யராஜ் உள்ளிட்டோர் முக்கிய கதாபாத்திரங்களில் நடிக்கின்றனர். இப்படத்திற்கு அனிருத் இசையமைக்கிறார்.

இத்திரைப்படத்தின் படப்பிடிப்பு பல கட்டமாக சென்னை, ஹைதராபாத், விசாகப்பட்டினம், மும்பை போன்ற நகரங்களில் நடைபெற்று வந்தது. சமீபத்தில், பூஜா ஹெக்டே ஒரு சிறப்பு பாடல் காட்சியில் நடனமாடுவார் என அதிகாரப்பூர்வமாக அறிவிக்கப்பட்டது.
இந்த சிறப்பு பாடல் காட்சி, கடந்த சில நாட்களுக்கு முன்பு படமாக்கப்பட்டதாக தகவல் வெளியாகியுள்ளது. இதில், நாகார்ஜூனாவும், பூஜா ஹெக்டேவும் இணைந்து நடனமாடியுள்ளனர். இதற்கு முன்பு, பூஜா ஹெக்டே, நாகார்ஜூனாவின் மகன்கள் நாக சைதன்யா, அகில் அக்கினேனி ஆகியோருடன் ஜோடியாக நடித்துள்ளார். தற்போது, நாகார்ஜூனாவுடன் முதல் முறையாக அவர் இணைந்து நடிப்பது குறிப்பிடத்தக்கது.