தெலுங்கு திரைப்பட உலகில் முன்னணி நடிகராகத் திகழ்பவர் நந்தமுரி பாலகிருஷ்ணா. சமீபத்தில் இவர் நடித்த “டாகு மகாராஜ்” திரைப்படம் வெளியானது. இப்படத்தை பாபி கொல்லி இயக்க, இசையமைப்பாளர் எஸ். தமன் இசையமைத்திருந்தார். இதில் பாபி தியோல், ஷ்ரத்தா ஸ்ரீநாத், ஊர்வசி ரவுத்தேலா, சாந்தினி சவுத்ரி ஆகியோர் முக்கிய கதாபாத்திரங்களில் நடித்திருந்தனர். கடந்த மாதம் 12-ஆம் தேதி வெளியான இந்த படம் ரூ.100 கோடியைத் தாண்டிய வசூலுடன் வெற்றியை பெற்றது.
இதன் பின், நந்தமுரி பாலகிருஷ்ணா “அகண்டா 2” படத்தில் நடித்து வருகிறார். அதற்கு மேல், அடுத்ததாக அவர் நடிக்கும் புதிய படத்தை கோபிசந்த் மலினேனி இயக்கவுள்ளார் என தகவல் வெளியாகியுள்ளது. மேலும், இப்படத்திற்கான இசையை உருவாக்க அனிருத் ரவிச்சந்தருடன் பேச்சுவார்த்தை நடந்து வருவதாகவும் கூறப்படுகிறது.
இந்த தகவல் உண்மையாக இருக்கும் பட்சத்தில், நந்தமுரி பாலகிருஷ்ணா நடித்த படத்துக்கு அனிருத் இசையமைப்பது இது முதல்முறையாக இருக்கும். இதற்கு முன், தெலுங்கு நடிகர் ஜூனியர் என்.டி.ஆர் நடித்த “தேவரா” திரைப்படத்திற்கு அனிருத் இசையமைத்திருந்தார் என்பது குறிப்பிடத்தக்கது.
