விக்ரம் நடிப்பில், பா.ரஞ்சித் இயக்கிய ‘தங்கலான்’ படத்தில் நடித்திருந்த மாளவிகா மோகனன், அதன் பின்னர் கார்த்தி நடிக்கும் ‘சர்தார்-2’ படத்திலும் நடித்துள்ளார். இப்போது, அவர் தெலுங்கில் பிரபாஸ் நடிக்கும் ‘ராஜா சாப்’ என்ற படத்திலும், மலையாளத்தில் மோகன்லாலுடன் ‘ஹிருதயபூர்வம்’ படத்திலும் நடித்து வருகிறார்.
இந்த நேரத்தில், ‘தங்கலான்’ திரைப்படம் ரோட்டர்டாம் சர்வதேச திரைப்பட விழாவில் திரையிட தேர்வாகியுள்ளதாக அறிவிக்கப்பட்டது. இதுதொடர்பான நிகழ்ச்சியில் பங்கேற்ற மாளவிகா மோகனன், ‘‘பார்வையாளர்கள் என்னை வழக்கமாக பார்க்கும் முறையிலிருந்து மாற்றி பார்க்க வேண்டும் என்று நான் விரும்பினேன். எனது சாதாரண நாயகி பிம்பத்தைக் குறைத்து, வித்தியாசமான கதாபாத்திரத்தில் நடிக்க காத்திருந்தேன். அப்போதுதான் ‘தங்கலான்’ வாய்ப்பு கிடைத்தது. அந்தக் கதாபாத்திரத்துக்காக நான் உயிரைக் கொடுத்தேனா இல்லையா என்பதைக் கூற முடியாது, ஆனால் அதற்காக மிகுந்த உழைப்பை செலுத்தினேன்.
அந்தப் படத்தில் வரும் முடியும் கூட என்னுடையது இல்லை. மேக்கப்பில் பெரிய வித்தியாசம் இருந்தது. இதனாலேயே ‘தங்கலான்’ படத்தில் நடிப்பது எனக்கு மிகவும் சுவாரசியமாகவும், ஒருவகையில் கடினமாக இருந்தது. ஆனால் அதே நேரத்தில், இது என்னால் எதிர்பார்க்கப்பட்ட புதிய அனுபவத்தைக் கொடுக்கும் என்பதைக் கவனித்தேன். அதனால் அந்த வாய்ப்பை முழுமையாக பயன்படுத்திக்கொண்டேன்’’ என்று கூறினார்.
