ஷங்கர் இயக்கத்தில் நடிகர் ராம் சரண் நடிப்பில் உருவாகியுள்ள கேம் சேஞ்சர் திரைப்படம் ஜனவரி 10 ஆம் தேதி திரைக்கு வரவிருக்கிறது. தமிழ் சினிமாவின் பிரம்மாண்ட இயக்குனராக அறியப்பட்டுள்ளவர் ஷங்கர். அவர் இயக்கத்தில் சமீபத்தில் கமல் நடிப்பில் வெளிவந்த இந்தியன் 2 திரைப்படம் எதிர்பார்த்த அளவுக்கு வெற்றி பெறவில்லை.
சமீபத்தில் நடைபெற்ற ஒரு நேர்காணலில், ஷங்கரிடம் லோகேஷ் கனகராஜ் இயக்கிய லியோ மற்றும் அட்லீ இயக்கிய ஜவான் படங்களைப் பற்றி கேள்வி எழுப்பப்பட்டது. அதற்கு ஷங்கர், நான் லியோ படத்தை பார்த்தேன். லோகேஷ் கனகராஜ் அதனை மிகவும் நன்றாக இயக்கியிருந்தார்.அதேபோல் ஜவான் படத்தின் ஒவ்வொரு காட்சியிலும் அட்லீ செய்த கடின உழைப்பு, ஈடுபாடு தெரிகிறது, அது எனக்கு பெருமிதத்தை அளிக்கிறது. சாதாரணமாக இவ்வளவு பெரிய வெற்றி எவருக்கும் கிடைக்காது. என் துணை இயக்குனர் இவ்வளவு உயரம் அடைந்தது எனக்கு மகிழ்ச்சியாக உள்ளது. என் மகன் சாதித்தால் எந்த அளவிற்கு பெருமை அடைவேனோ, அதேபோல் எனக்கு பெருமை தருகிறது என்று அவர் தெரிவித்தார்.
அட்லீ மற்றும் லோகேஷ் கனகராஜ் இருவரும் நடிகர் விஜய் நடிப்பில் படங்களை இயக்கியுள்ளனர் என்பது குறிப்பிடத்தக்கது. இந்நிலையில், ஷங்கர் இயக்கத்தில் நடிகர் ராம் சரண் நடிப்பில் உருவாகியுள்ள கேம் சேஞ்சர் படத்தின் டீசர் நாளை வெளியாக உள்ளது.
