தென்னிந்திய சினிமாவில் முக்கியமாக எதிர்பார்க்கப்படும் படங்களில் ஒன்றாக இருக்கிறது அல்லு அர்ஜுனின் புஷ்பா 2 மற்றும் அதன் பின் ஷங்கர் இயக்கத்தில் உருவாகும் ராம்சரண் நடிப்பில் உருவாகும் கேம் சேஞ்சர். குறிப்பாக, சில மாதங்களுக்கு முன்பு ஷங்கர் இயக்கத்தில் வெளியான இந்தியன் 2 திரைப்படம் எதிர்பார்த்த அளவிலான வெற்றியை பெறாததால், கேம் சேஞ்சர் திரைப்படத்தின் வெற்றி ஷங்கருக்கு மிகவும் முக்கியமாக இருக்கிறது. இதனால், இந்த படத்தின் கதையை மிகப் பிரமாண்டமாக உருவாக்கியதோடு, பாடல் காட்சிகளுக்கும் வழக்கம்போல் அதிக முக்கியத்துவம் அளித்து தயாரித்துள்ளதாக கூறப்படுகிறது.
பாடல் காட்சிகளுக்கு மட்டும் ஒரு சிறிய படத்தின் பட்ஜெட்டுக்கே சமமான செலவை செய்யக் கூடிய ஷங்கர், கேம் சேஞ்சர் திரைப்படத்தில் ராம்சரண் மற்றும் நாயகி கியாரா அத்வானி ஆடிப் பாடும் ஒரு பாடலுக்கு மட்டும் 15 கோடி ரூபாய் பட்ஜெட்டில் படமாக்கியதாக தகவல் கிடைத்துள்ளது.
இந்த பாடலின் படப்பிடிப்பு முழுவதும் நியூசிலாந்தில் நடைபெற்றது. ஏற்கனவே இந்த திரைப்படத்திலிருந்து தமன் இசையில் “ஜருகண்டி” மற்றும் “ரா மச்சான் மச்சான்” ஆகிய பாடல்கள் வெளியாகி இருக்கின்றன. இந்நிலையில், இப்படத்தின் மூன்றாவது பாடல் வரும் நவம்பர் 27ஆம் தேதி வெளியிடப்படும் என்று அறிவிக்கப்பட்டுள்ளது.
