அஜித் தற்போது இரண்டு முக்கிய படங்களில் நடித்து வருகிறார். மகிழ்திருமேனி இயக்கத்தில் உருவாகும் ‘விடாமுயற்சி’, ஆதிக் ரவிச்சந்திரன் இயக்கத்தில் உருவாகும் ‘குட் பேட் அக்லி’ ஆகியவை. இதில் ‘விடாமுயற்சி’ படமே முதலில் தொடங்கப்பட்டது. இந்த ஆண்டு தீபாவளிக்காவது படம் வெளியாகுமென எதிர்பார்த்திருந்தனர். ஆனால், படப்பிடிப்பு திட்டமிட்டபடி நடக்காததால் படத்தின் வெளியீடு தள்ளிப் போனது.
அதனைத் தொடர்ந்து ‘குட் பேட் அக்லி’ படத்தை 2025 பொங்கல் ரிலீசாக அறிவித்தனர். ஆனால், அதன்பிறகு வெளியான தகவல்களில் அந்த தேதி குறித்து எந்தக் குறிப்பும் இல்லாமல் தவிர்க்கப்பட்டது. இந்நிலையில், மைத்ரி மூவி மேக்கர்ஸ் நிறுவனத்தினர் வினியோகஸ்தர்களிடம் 2025 பொங்கலுக்கே படம் வெளியாகும் என உறுதியளித்துள்ளதாக தகவல்கள் வெளியாகியுள்ளன.
‘விடாமுயற்சி’ படத்தை அடுத்த கோடை விடுமுறையில் வெளியிடலாம் என பேசப்படுகிறது. இதே பொங்கலுக்குப் பாலா இயக்கத்தில் அருண் விஜய் நடித்துள்ள ‘வணங்கான்’, ஷங்கர் இயக்கத்தில் ராம் சரண் நடித்த தெலுங்கு படம் ‘கேம் சேஞ்சர்’ (தமிழில் டப்பிங் செய்யப்பட்டு) ஆகியவை வெளியாக உள்ளன. மேலும், விக்ரம் நடித்த ‘வீர தீர சூரன்’, கார்த்தி நடித்த ‘வா வாத்தியார்’ ஆகிய படங்களும் பொங்கல் ரிலீசாக இருக்கலாம் என எதிர்பார்க்கப்படுகிறது. விரைவில் எந்தெந்த படங்கள் பொங்கல் வெளியீடு என்பது உறுதியாகத் தெரியும்.
