இத்தாலியில் அமைந்துள்ள புகழ்பெற்ற பார்முலா 1 கார் பந்தய வீரர் அயர்டன் சென்னாவின் சிலையின் காலில் நடிகர் அஜித் குமார் முத்தமிட்டுள்ளார். இதனைக் குறித்த வீடியோ சமூக வலைதளங்களில் வேகமாக பரவி வருகின்றது.
அயர்டன் சென்னா, பிரேசிலைச் சேர்ந்த உலகப் புகழ்பெற்ற பார்முலா 1 கார் பந்தய வீரராக இருந்தார். இவர் 1988, 1990 மற்றும் 1991 ஆண்டுகளில் மெக்லாரன் அணிக்காக பார்முலா 1 உலக சாம்பியன் பட்டத்தை வென்றார். பார்முலா 1 வரலாற்றில் மிகவும் சிறந்த ஓட்டப்பந்தய வீரர்களில் ஒருவர் என்ற பெருமை பெற்றவர். 1994ஆம் ஆண்டு மே 1ஆம் தேதி, சான் மரினோ கிராண்ட் ப்ரீயில் (இமோலா) வில்லியம்ஸ் அணிக்காக பந்தயத்தில் பங்கேற்றபோது, தாம்புரெல்லோ வளைவில் ஏற்பட்ட விபத்தில் 34வது வயதில் உயிரிழந்தார்.
அவரது மரணம், பார்முலா 1 பந்தயத் தொடரில் பாதுகாப்பு விதிகளை மேம்படுத்தும் முக்கிய காரணியாக அமைந்தது. சென்னாவின் உற்சாகம், திறமை, மற்றும் மனிதாபிமான பணிகள் அவரை உலகளவில் மிகவும் மதிக்கப்படும் நபராக மாற்றின. அவரது நினைவாக பிரேசிலில் ஏழை குழந்தைகளுக்கான கல்விக்காக “சென்னா நிறுவனம்” செயல்பட்டு வருகிறது.
